سەرۆک وەزیرانی عێراق و فەرماندەی گشتیی هێزە چەكدارەكان لە پەیامێکدا داوای لێکۆڵینەوەی بەپەلە لە هێرشەکەی شەوی ڕابردووی فڕۆکەخانەی هەولێر و باشیک دەکات.
لیوا یەحیا ڕەسوڵ، وتەبێژی فەرماندەی گشتیی هێزە چەكدارەكانی عێراق لە ڕاگەیەندراوێکدا ڕایگەیاند" مستەفا كازمی، فەرماندەی گشتیی هێزە چەكدارەكان و سەرۆک وەزیران داوایكردووە، دەستبەجێ لێکۆڵینەوە لە پەلامارەکەی هەولێر و ناوچەکانی دیکە بکرێت".
وتەبێژی فەرماندەی گشتی هێزە چەکدارەکانی عێراق ئاماژەی بەوەکردووە کە کازمی جەختیکردۆتەوە، ئاسایشی عێراق بەرپرسیارێتییەکە لە ئەستۆی حکومەت و هێزە ئەمنییەکانە بەهەموو پێکهاتەکانییەوە، ئەنجامدانی ئەم جۆرە کارانە لە مانگی رەمەزاندا ئامانج لێیان تێکدانی ئاسایشی وڵاتە.
وتیشی" هەندێک کەس و لایەن دەیانەوێت پشێوی و ناسەقامگیری ئەمنی دروستبکەن، ئەمەش کارێکی رەتکراوەیە و شانبەشانی گەلی عێراق و بە هێزی یاسا روبەڕوی دەبنەوە".
شەوی ڕابردوو هێرشی موشەکی کرایەوە سەر فڕۆکەخانەى هەولێرو لەوبارەیەوە وەزارەتى ناوخۆی حکومەتى هەرێمیش رایگەیاند" هێرشەکە بە ڕێگەی درۆنی TNT کراو بووە و ئاراستەی بنکەی هێزەکانی هاوپەیمانان کراوە لە ناو فڕۆکەخانە، خۆشبەختانە هیچ زیانێکی گیانی نییە و تەنیا زیانی ماددی بەر باڵاخانەیەک کەوتووە، لێکۆلینەوەکانیش بەردەوامن بۆ دیاریکردنی سەرچاوە و شوینی هاتنی درۆنەکە".