پێنج وڵاتی گەورەی جیهان هێرشەکانی سەر کوردستانی عێراق لەلایەن میلیشیا چەکدارەکانەوە مەحکوم دەکەن.
ئاژانسی فرانس پرێس کەمێک لە مەوبەر بڵاویکردەوە هەریەک لە بەرلین و پاریس و رۆما و لەندن و واشنتۆن هێرشەکانی سەر کوردستانی عێراق مەحکوم دەکەن.
لە رااگەیەندراوێکدا کە ئەمڕۆ هەینی ١٦ ی نیسان بڵاوکرایەوە ئەمریکا و ئیتالیا و ئەڵمانیاو فەرەنسا و بەریتانیا لەبارەی هێرشەکەی دوو رۆژ لەمەوبەری هەولێر رایانگەیاند "ئێمە بەتووندترین شێوە هێرشەکەی ١٤ی نیسانی سەر هەرێمی کوردستانی عێراق مەحکوم دەکەین".
هەروەها هاتووە " وڵاتەکانمان پێکەوە پاڵپشتی لە حکومەتی عێراق دەکەن بۆ لێکۆڵینەوە لە هێرشەکە، بۆ دڵنیابوونەوە لەوەی کە بکەرانی هێرشەکە بە سزای خۆیان بگەن".
لە بەشێکی دیکەی راگەیێندراوەکەدا هاتووە: "هێرشکردنە سەر بنکە و سەربازەکانمان شیاوی قبووڵکردن نییە، هەروەها بەتوندی جەخت لە شەڕکردن دژی داعش دەکەینەوە".
شەوی ١٤ ی نیسان لە رێگای فرۆکەی درۆن تی ئێن تی یەوە هێرشکرایە سەر بنکەی هاوپەیمانان لەنێو فڕۆکەخانەی نێودەوڵەتیی هەولێر و زیان بە بینایەکی بەرز کەوت، بەلآم زیانی گیانی بەداوە نەبوو، هاوکات بۆ چەند کات ژمێرێک گەشتە ئاسمانییەکانی فڕۆکەخانەی هەولێ راگیران.