لەكۆبوونەوەی ئەمرۆی هێزی پێشمەرگە‌و میلیشیا شیعەكان‌و لایەنە حكومییەكانی خورماتوو سێ بڕیار بۆ هێوركردنەوەی بارودۆخی خورماتوو دەركرا.

پاش كۆبوونەوەكە لە كۆبوونەوەیەكی رۆژنامەوانیدا بڕیارەكان ئاشكرا كران كە بریتین لە:
یەكەم: سەركۆنەكردنی سەرجەم هەوڵ و كارە نایاساییەكانی میلیشیاكانی دەرەوەی یاسا لە كوشتن، گرتن و رفاندن، هێرشكردنە سەر موڵك و ماڵی هاووڵاتیان.

دووەم: سەرجەم ئەنجامدەرانی ئەو كارە نایاساییانە كە فەرمانی دەستگیركردنیان هەیە رادەستی هێزەكانی پۆلیس و ئاسایش بكرێن و رووبەڕووی یاسا بكرێنەوە، بێئەوەی هیچ لایەك پشتیوانیان لێبكەن، هەروەها هەردوولا، پێشمەرگە و حەشدی شەعبی لە دەستگیركردنی بكەرەكان و هێوركردنەوەی دۆخەكە هاوكاری ئاسایش و پۆلیس بكەن.

سێیەم: بەردەوامبوونی كۆبوونەوەكان بەشێوەی خولی و جێبەجێكردنی بڕیارەكان.

هاوكات رێككەوتنیش دەكرێت لەبارەی دۆزینەوەی میكانیزمێك بۆ دابەشكردنی پۆستە ئەمنییەكانی شارۆچكەكە. بڕیارە ئێوارەی رۆژی دووشەممە لە مەكتەبی سیاسی یەكێتیی نیشتمانیی كوردستان، هادی عامری، ئەمینداری رێكخراوی بەدر و سەركردەی یەكەمی هێزە چەكدارەكانی حەشدی شەعبی لەگەڵ بەرپرسانی سەربازی و سیاسی یەكێتی لە شاری سلێمانی، لەبارەی پرسەكانی خوورماتوو كۆببێتەوە.

شارۆچكەی خورماتوو سەر بە پارێزگای سەڵاحەدینە ‌و نزیكەی 100 كلیۆمەتر لە پارێزگاكەوە دوورە، ناوچەیەكی كوردستانی دەرەوەی ئیدارەی هەرێمی كوردستانە و ماددەی 140 دەیگرێتەوە. ژمارەی دانیشتووانی خورماتوو بە شارەدێ ‌و گوندەكانییەوە نزیكەی 220 هەزار كەس دەبێت، كورد 55% ‌و عەرەب 15%‌و توركمانیش 30% شارۆچكەكە پێكدەهێنن.