ئەمڕۆ ئەنجومەنی وەزیران کۆبووەوە و چەند بڕیارێکی نوێی دەرکرد و بڕیاردرا کە فه‌رمانگه و‌ یه‌كه‌ كارگێڕییه‌كان و ژماره‌ی كارمه‌ندان و گرێبه‌سته‌كان کەمبکرێتەوە.

لەڕاگەیەندراوی کۆبوونەوەکەدا هاتووە " له‌ سه‌ره‌تای كۆبوونه‌وه‌كه‌دا به‌ڕێز ڕابه‌ر سدیق بریكاری وه‌زاره‌تی دارایی و ئابووری به‌وه‌كاله‌ت، پوخته‌یه‌كی ده‌رباره‌ی پلانی وه‌زاره‌ت بۆ ئاماده‌كردنی ڕاپۆرتێك سه‌باره‌ت به‌ پێشبینیى داهات و خه‌رجییه‌ گشتییه‌كان له‌ هه‌رێمی كوردستان بۆ ساڵی 2017 پێشكه‌ش كرد و تیایدا ئه‌و هه‌نگاوانه‌ی خسته‌ ڕوو كه‌ تا ئێستا له‌وباره‌یه‌وه‌ نراون و باسی له‌ ڕۆڵی وه‌زاره‌ت و دامه‌زراوه‌كانى حكوومه‌ت له‌ جێبه‌جێكردنی ئه‌م پڕۆژه‌یه‌دا كرد.له‌مباره‌یه‌وه‌ ئه‌نجومه‌نى وه‌زیران وه‌زاره‌ت و دامه‌زراوه‌كانى هه‌رێمى كوردستانى ڕاسپارد كه‌ بۆ ئه‌م مه‌به‌سته‌ پشتیوانیى وه‌زاره‌تى دارایى و ئابوورى بكه‌ن و زانیاریى پێویست له‌سه‌ر خه‌رجى و داهاته‌كانیان بخه‌نه‌ به‌رده‌م وه‌زاره‌ت تاكو له‌به‌ر ڕۆشنیایى ده‌ره‌نجامى ئه‌و ڕاپۆرته‌، بارى داراییى هه‌رێمى كوردستان بۆ ساڵى 2017 ڕێكبخرێته‌وه‌".