حەیدەر عەبادی رایدەگەیەنێت، گەندەڵی لەنێو هێزەکانی
پێشمەرگەدا هەیە کە ئەوەش وایکرد هەرێمی کوردستان لە ٢٠١٤ نەتوانێت روبەروی چەکدارەکانی
داعش ببێتەوە و داوای یارمەتی لە ئەمریکا و ئێران کرد.
ئەمڕۆ رۆژنامەی ئیندپێندێنتی بەریتانی چاوپێکەوتنێکی
لە حەیدەر عەبادی سەرۆک وەزیرانی عێراق بڵاوکردەوە کە تیایدا دەڵێت '' ئاشتی لە عێراقدا
بەرپا دەبێت ئەویش بەهۆی شکستی داعش و ئەو کوردانەی ویستیان جیاببنەوە، عێراق سنورێک
بۆ دەسەڵاتی هەرێمی کوردستان دادەنێین''.
راشیگەیاند '' شانازی دەکەم بەوەی کە هێزە عێراقییەکان
بە قوربانییەکی کەم توانییان کۆنترۆڵی ناوچە کێشە لەسەرەکان بکەن ، فەرمانم کرد بە
هێزەکان کە هەتا دەتوانن شەڕ نەکەن، چونکە شەڕکردن لەنێوان پێشمەرگە و حکومەتی عێراق
کارەکە ئاڵۆز دەکات''.
وتیشی '' سەرجەم سنورەکانی عێراق لە ناوەوە و دەرەوە
پێویستە لەژێر دەسەڵاتی حکومەتی ناوەند بێت، بۆیە پێویستە بۆری نەوتی هەرێمی کوردستان
و خاڵی سنوری فیشخاپور بەهەمان شێوە لە دەسەڵاتی حکومەتی ناوەند بێت''.
ئاماژەی بەوەشداوە، کە حوکمەتی عێراق پێیوایە کە دەبێت پێشمەرگە ببێت
بەشێک لە هێزە عێراقییەکان یان ببێتە هێزێکى ناوخۆیى.