دادگای فیدراڵی عێراق رایگەیاند كە بەپشتبەستن بە شرۆڤەیەی مادەیەكی یەكی دەستور گەیشتونەتە ئەو بڕوایەی كە هیچ پێكهاتەیەكی عێراق بۆی نییە جیاببێتەوە ئەوەش وەك ئاماژەیەك بۆ ئەنجامدانی ریفراندۆمی هەرێمی كوردستان .

رۆژی دووشەممە 6-11-2017، دادگای فیدراڵی عێراق دانیشتتنێکی ئەنجامدا و لەبارەی گشتپرسیی باشووری کوردستان بۆ جیابوونەوە لە عێراق بڕیارێکی دەرکرد.

ئیاس ساموک، وتەبێژی فەرمی دادگای باڵای فیدراڵی رایگەیاند: "بڕیارەکە تایبەتە بە شیکردنەوەی ماددەی (1)ی دەستوور. دادگای فیدراڵی بەو ئەنجامە گەیشت کە ئەو ماددەیە و ماددە دەستوورییەکانی دیکەی پەیوەست، جەختیان لە یەکپارچەیی خاکی عێراق کردووەتەوە و ماددەی ( 109)ی دەستوور سەرجەم دەسەڵاتە فیدراڵییەکانی پابەندکردووە بە پاراستنی ئەو یەکپارچەییە".

راشیگەیاند: "دادگای باڵای فیدراڵی لە بڕیارەکەیدا بەو ئەنجامە گەیشتووە کە هیچ دەقێک لە دەستوور (لەژێر سایەی بڕیارە جێبەجێکراوەکانی)دا نییە رێگە بە جیابوونەوەی هیچ پێکهاتەیەک بدات کە لە ماددەی( 116)ی دەستووردا جێگیرکراون".