بەپێی یاسای تۆمارکردنی حیزبی سیاسی نوێ، یان قەوارەی سیاسی نوێ لەماوەیەکی کەمدا کۆنگرە بکرێت، لەو روانگەیەوە بەرهەم ساڵح کە لەدەرەوەی وڵاتە بەزووترین کات دەگەڕێتەوە هەرێم و کۆنگرەی حیزبەکەی ساز دەکات.
د. ڕێبوار کەریم، وتەبێژی هاوپەیمانی بۆ دیموکراسی و دادپەروەری بە دەنگی ئەمریکای ڕاگەیاند کە ئەوان بە نیازن "لە سەرجەم هەڵبژاردنەکانی داهاتووی عێراق و هەرێمی کوردستاندا بەشداری بکەن و خۆیان بۆ ئەو پرسە ئامادەکردووە".
هەروەها داوای لە هەموو لایەنەکان کرد کە "لە بەرەیەکی هاوبەشدا کۆببنەوە و بەیەکەوە هەوڵبدەن بۆ گۆڕینی سیستەمی حوکمڕانی و هەموو جومگەکانی دەسەڵات لە هەرێمی کوردستاندا".
د. بەرهەم ساڵح کە پێشتر جێگری سکرتێری یەکێتی نیشتیمانی کوردستان بوو، ساڵی پار دەستی لە کار کێشایەوە و هاوپەیمانی بۆ دیموکراسی و دادپەروەری دامەزراند.
ناوبراو ئێستا لە دەرەوەیە، بەپێی زانیاریەکانی سپی گەشتەکەی کورتکردۆتەوەو لەماوەیەکی کەمدا دەگەڕێتەوە هەرێم بۆ بەستنی کۆنگرەی حیزبەکەی.