بزوتنەوەی گۆڕان پشتیوانیی خۆی بۆ داواكاریی خۆپیشاندەرانی شار و شارۆچكەكانی هەرێم دوپات دەكاتەوە و داواش دەكات گیانی خۆپیشاندەران بپارێزرێت و نەوەی نوێش لە ریزی خۆپیشاندەراندان.
لەگەڵ خۆپیشاندەرانی سەرتاسەری لە شارو شاۆرۆچكەكانی هەرێم، بزوتنەوەی گۆڕان لە بەیاننامەیەكدا رایگەیاندوە "پشتیوانی لە داوا رەواكانی خۆپیشاندان و مانگرتنەكان دەكەین و پێویستە دەستبەجێ حكومەت و پەرلەمان بەدەم داواكاریی خۆپیشاندەرانەوە بچن".
هەر لە بەیاننامەكەدا هاتوە "بەكارهێنانی هەمو جۆرە توندوتیژییەك دژی خۆپیشاندەران ئیدانە دەكەین و داوا لە هێزە ئەمنییەكانیش دەكەین گیانی خۆپیشاندەران بپارێزن".
تەئكیدیش لەسەر ئەوە كراوەتەوە كە پێویستە "رێكەوتنی نێوان حكومەتی هەرێم و حكومەتی فیدراڵ شەفاف بكرێت و ئاشكرا بكرێت".
هاوكات دوێنێش نەوەی نوێ لە ڕاگەیەندراوێكدا پشتیوانی بۆ خۆپیشاندانی مامۆستایان و فەرمانبەران دەربڕی و ئەمڕۆش كادرانی گۆڕان و نەوەی نوێ لە ڕیزی خۆپیشاندەران دەبینران.