جەبار ئەمین ئەندامی پەرلەمانی وڵاتی سوید لەكاتی گەشتكردنی بۆ وڵاتی توركیا و لەفڕۆكەخانەی ئیستانبوڵ دەستبەسەر كرا.
میدیاكانی وڵاتی سوید بلاویان کردەوە، جەبار ئەمین كە بەرەچەڵەك كوردە و ئەندامی پەرلەمانی ئەو وڵاتەیە لەكاتی گەیشتنی بە فڕۆكەخانەی ئیستەنبوڵ لەلایەن لێپرسراوان ئەمنی فڕۆكەخانەكەوە دەستبەسەركراوە و پاسپۆرتەكەشیان لێ سەندووە.
میدیاكانی سوید ئاماژە بەوە دەكەن " لەكاتی دەستبەسەركردنی جەبار ئەمیندا هێزە ئەمنییەكان وتوویانە فەرمانی دەستبەسەركردنت لەسەرەوە دراوە، بەبێ ئەوەی ناوی ئەو دەزگا و شوێنە ئاشكرا بكەن كە بڕیاری دەستبەسەركردنەكەی بۆ جەبار ئەمین دەركردووە".
جەبار ئەمین ئەندامی پەرلەمانی سویدە لەسەر پارتی سەوزی ئەو وڵاتە و وەك چاودێری هەڵبژاردنەكانی سەرۆكایەتی توركیا سەردانی ئەو وڵاتەی كردووە.
لەمانگی ئایاریشدا سەرپەرشتی هەڵبژاردنەکانی عێراقی دەکرد.
جەبار ئەمین خەڵکی شاری سلێمانییەو ساڵانێکی زۆرە لە سوید دەژی و دوو خوولە ئەندامی پەرلەمانی ئەو وڵاتەیە.