لە وتاری دامەزراندنی پارتی دیموکراتی کوردستان، سەرۆکەکەی مەسعود بارزانی جەختی لەسەر ئەوە کردەوە کە ئەوان لەگەڵ دواخستنی هەڵبژاردندا نین.
بارزانی لە وتەیەکدا کە بەرپرسانی حیزبەکەی و نوێنەری ژمارەیەک حیزبی تر بەشداربوون رایگەیاند " چارەسەری دۆخی ناوخۆی هەرێمی کوردستان هەڵبژاردنە نەک دواخستنی، بەراشکاویی دەیڵێم ئێمە وەک پارتی لەگەڵ دواخستنی هەڵبژاردن نین و لەگەڵی نابین. هەروەها داوای لە لایەنە سیاسییەکان کرد پێکەوە بچنە بەغدا وگوتی، ئەمە پرسێکی نەتەوەیی و چارەنووسسازە بۆ هەموومان، حەقە دەست لە یەکترشکاندن و دژایەتی یەکدی هەڵگرین".
سەبارەت بە دۆخی ناوخۆی هەرێمی کوردستان، بارزانی هەڵبژاردنی بە چارەسەرێک بۆ ئەو دۆخە زانی و رایگەیاند: "بۆ چاککردنی دۆخی ناوخۆ کە هەموومان گلەییمان هەیە لەو دۆخە، دەبێت چاکسازیی بکرێت و هەنگاوی زۆر گەورە بهاوێژرێ، بەڵام بەڕاستی ئەمە لەکاتێکدا دەبێت کە هەڵبژاردنێکی ناوخۆییش بکەین بۆ هەرێمی کوردستان و حکومەتێکی نوێ و حکومەتێکی بەهێز دابمەزرێت، بۆ ئەوەی هەمووشمان پشتیوانی لێبکەین بۆ نەهێشتنی ئەو کەموکوڕییانە و دەستکردن بە چاکسازییەکی بنەڕەتی لە هەموو بوارێکدا".
مەسعود بارزانی لەدرێژەی قسەکاندیا وتی: "ئیدی ئومێدەوارم لەجیاتی ئەوەی بیر لەوە بکرێتەوە هەڵبژاردن دوابخرێت بیر لەوە بکەینەوە چۆن هەموومان پێکەوە هەڵبژاردنێکی بێگەرد و بێ گیروگرفت و شەفاف ئەنجام بدەین، فەرموون لە یوئێن، لە رێکخراوەکانی بیانی لە چاودێریی ناوخۆمان چ پێویستە بکرێت بۆ ئەوەی چاودێریی بکرێت و نەهێڵین هیچ گلەییەک بێتە سەر ئەو هەڵبژاردنە و هەڵبژاردنەکە ئەنجام بدرێت و بەرەو دامەزراندنی حکومەتێکی بەهێز بچین، ئەمە چارەسەرە و من لێرەدا دەمەوێت بە راشکاوی بڵێم، وەکو پارتی بەهیچ شێوەیەک لەگەڵ دواخستنی هەڵبژاردن نین و لەگەڵیشی نابین".
سەرۆکی پارتی راشیگەیاند "ئێستا کاتی ئەوەیە هەموو لایەک بەخۆماندا بچینەوە و لاپەڕەیەکی نوێ هەڵدەینەوە و پارتی دەستی برایەتی، هاوکاریی و دۆستایەتی بۆ هەموو لایەک درێژ دەکاتەوە. ئێمە پێکەوە دەتوانین دەستکەوتی گەورە بەدەستبهێنین، ئەگەریش بەوردیی سەیر بکەین هەرچی دەستکەوتی گەورەیە کە بەدەستهاتووە لەوکاتانەدا بووە کە ئێمە تەبا بووین و پێکەوە بووین. پێویستە ئێمە عیبرەت لەو ئەزموونە وەربگرین".
بارزانی وتیشی "بە رەغمی هەموو کەموکوڕییەکانی کە لە هەڵبژاردنی پەرلەمانی عێراق روویاندا بەڵام واقعێک ئێستا هاتووەتەپێش و ئەمە دەرفەتێکیشە، دەرفەتێکە بۆ چارەسەرکردنی زۆربەی کێشەکان. خۆشبەختانە پارتی و یەکێتی گەیشتوونەتە رێککەوتنێکی باش کە پێکەوە و بە یەک بەرنامە و بەیەک شاند گفتوگۆ لەگەڵ بەغدا بکەن، من لێرەوە داوا لە هەموو لایەنەکانی دیکەش دەکەم، کە هەموو پێکەوە بین، ئەمە پرسێکی نەتەوەیی و چارەنووسسازە بۆ هەموومان، حەقە دەست لە یەکترشکاندن و دژایەتی یەکدی هەڵگرین، هیچ سوودێکمان لەوە وەرنەگرتووە".