نوسینگه‌ی تایبه‌تی هێرۆ ئیبراهیم ئه‌حمه‌د له‌سه‌ر ئەو نوسراوەی
تایبەت بوو بە پۆستی سەرۆک کۆماری عێراق، ڕوونکردنەوەیەکی بڵاوکردەوەوە و دەڵێت "ئه‌و
نوسراوه ره‌شنوسی بڕگه‌یه‌ك بوه له‌پاكێجێك، به‌بێ ره‌زامه‌ندی و واژۆی به‌رێزیان
بڵاوكراوه‌ته‌وه".
دوای دوو ڕۆژ لە بڵاوکردنەوەی نوسراوێک بە ناویەوە لە سەرجەم
میدیاکان، هێرۆ ئیبراهیم لە بارەی ئەو نوسراوەوە ڕوونکردنەوەیەکی بڵاوکردەوە و
تێیدا هاتووە "ئێواره‌ی رۆژی 1ی ئه‌یلولی 2018، له‌سه‌ر له‌بارودۆخی
سیاسی له عیراق و هه‌رێمی كوردستان و گفتوگۆی لایه‌نه سیاسییه‌كان، هاوكات
پرسی پۆستی سه‌رۆك كۆماری داهاتوو و چۆنیه‌تی به‌شداری كورد له حكومه‌تی
داهاتووی عیراق، له‌میدیاكاندا نوسراوێك به‌ناوی خاتوو(هێرۆ ئیبراهیم ئه‌حمه‌د)ئه‌ندامی
مه‌كته‌بی سیاسی یه‌كێتیی نیشتمانیی كوردستان بڵاوكرایه‌وه".
نوسینگه‌ی تایبه‌تی هێرۆ ئیبراهیم ئه‌حمه‌د، ڕاشیگەیاندووە"به‌پێویستی
ده‌زانین رایگشتی و ئه‌ندام و هه‌ڤاڵانی یه‌كێتیی نیشتمانی ئاگادار بكه‌ینه‌وه،
كه ئه‌و نوسراوه ره‌شنوسی بڕگه‌یه‌ك بووه له‌پاكێجێك سه‌باره‌ت به‌ره‌وشی
سیاسی ناوچه‌كه، كه به‌بێ ره‌زامه‌ندی و واژۆی به‌رێزیان بڵاوكراوه‌ته‌وه".
له‌كۆتایی رونكردنه‌وه‌كه‌دا هاتووە:"دوپاتیده‌كه‌ینه‌وه
كه هێرۆ ئیبراهیم ئه‌حمه‌د ڕای خۆی ده‌رباره‌ی پرسه چاره‌نوسسازه‌كان له
عیراق و هه‌رێمی كوردستان و پرسی سه‌رۆك كۆمار و پێگه و پشكی كورد له پرۆسه‌ی
سیاسی عیراق، له‌كات و شوێنی خۆی ده‌رده‌بڕێت"