سەرۆک وەزیرانی حکومەتی هەرێم ڕایگەیاند بەردەوام دەبن لە ڕزگارکردنی ئێزیدییەکان.
نێچیرڤان بارزانی، له په‌يامێكدا پیرۆزبایی جه‌ژنى "رۆژى يێت ئێزى" له کوردانی ئێزدی دەکات و رایدەگەیێنێت، تاوەکو رفێندراوێكى ئێزدى له ده‌ست داعشدا مابێت، له هه‌وڵى به‌رده‌وامدا ده‌بن بۆ رزگاركردنيان.
دەقی پەیامەکەی نێچیرڤان بارزانی بۆ جەژنی يێت ئێزى کوردانی ئێزدی
ب گه‌رمى جه‌ژنا "ڕۆژى يێت ئێزى" ل خوشك و برايێت هێژايێت ئێزدى ل كوردستانێ و هه‌ر ده‌ره‌كا دنيايێ هه‌بن، پيرۆز دكه‌م. هيڤيدارم جه‌ژنه‌كا خۆش و ئارام ده‌رباس بكه‌ن و جه‌ژن ببێته ئه‌گه‌رێ بجهبوونا زێده‌ترا ئاشتيێ و پێكڤه‌ژيانێ و ڤه‌گه‌ڕيانا خێر و خۆشيێ بۆ خوشك و برايێت مه يێت ئێزدى و هه‌مى خه‌لكێ كوردستانێ.
ئه‌ڤ جه‌ژنه ژى جاره‌كا دى د ده‌مه‌كێدا ڤه‌دگه‌ڕيت كو مخابن هێشتا هژماره‌كا مه‌زنا ئێزدييان د كامپێت ئاواره‌ييێدا دژين و نه‌شياينه ڤه‌گه‌ڕنه سه‌ر جهـ و وارێت خۆ. هيڤيدارم جه‌ژنێت بهێن هه‌مى ب سه‌رفرازى ڤه‌گه‌ڕيابن سه‌ر جهـ و وارێت خۆ يێت ئارام و ئاڤه‌دانكرى و حكوومه‌تا هه‌رێما كوردستانێ دێ هه‌موو هه‌ولێ ژبۆ ڤێ يه‌كێ ده‌ت.
هه‌ر ب ڤێ هه‌لكه‌فتنێ هه‌مى خوشك و برايێت مه يێت ئێزدى پشتڕاست ده‌كه‌ين كو هه‌تا خوشكه‌ك يان برايه‌كێ مه يێ ئێزدى يێ ڕه‌ڤاندى ل ناڤ داعشێ يان ل هه‌ر جهه‌كێ مابيت، ئه‌م دێ به‌رده‌وام هه‌وڵ ده‌ين وان ڕزگار بكه‌ين و ڤه‌گه‌ڕينين ناڤ كه‌سوكارێت وان.
سلاڤ و دروود بۆ گيانێ هه‌مى قوربانيێت ده‌ستێ تيرۆرێ و ئه‌م ب ڕێز و حورمه‌ت وان ب بير تينين.
جاره‌كا جه‌ژنا هه‌ميان پيرۆز بيت.
نێچيرڤان بارزانى
سه‌رۆك وه‌زيرێ هه‌رێما كوردستانێ
14/12/2018