لەکاتێکدا ئیدارەی واشنتن لە گفتوگۆدایە سەبارەت وەرگرتنەوە یان وەرنەگرتنەوەی ئەو چەکانەی رادەستی یەپەگەی کردووە، کاروانێکی دیکەی چەک و کەرەستەی سەربازی لە رێگای هەرێمی کوردستانەوە گەیەنراوەتە بنکە سەربازییەکانی هاوپەیمانان لە منبج و رەقە.
بەپێی زانیارییەکانی ڕوانگەی سوری بۆ مافەکانی مرۆڤ، درەنگانی شەوی رابردوو نزیکەی ٢٠٠ بارهەڵگری پڕ لە چەک و کەرەستەی سەربازی و لۆجیستی لە ڕێگای هەرێمی کوردستانەوە گەیەنراوەتە بنکەکانی هاوپەیمانان لە ناوچەکانی رۆژهەڵاتی فورات (منبج و رەقە).
روانگەی سوری رایگەیاندوە، لە دوای بڕیاری کشانەوەی هێزەکانی ئەمریکا لە سوریا ئەمە دووەمین کاروانی سەربازییە کە لە رێگای هەرێمی کوردستانەوە ڕەوانەی ناوخاکی سوریا و هێزەکانی هاوپەیمانان کرابێت.
١٩ی ئەم مانگە دۆناڵد ترەمپ سەرۆکی ئەمریکا بە بڕیارێکی فەرمی کشانەوەی هێزەکانی وڵاتەکەی لە رۆژئاوای کوردستان راگەیاند و ئەو بڕیارەش کاردانەوەی جیاوازی ناوخۆ و دەرەوەی کوردستانی لێکەوتەوە.