هەشت ساڵە دۆسیەی هێرشکردنە سەر ئاسۆس هەردی لە دادگاکاندا دێت و دەچێت

ئەمڕۆش ٢١ ی ئایار دانیشتنێکی تری دادگاییکردنی هێرشبەرانی سەر ئاسۆس هەردی رۆژنامەنووس تێپەڕی، بەبێ ئامادەبوونی تۆمەتباران، ماوەی هەشت ساڵە ئەم دۆسیەیە لەدادگاکاندا دێت و دەچێت و یەکلای نەبۆتەوە.

کارزان فازڵ پارێزەری‌ دۆسیەی‌ هێرشکردنە سەر ئاسۆس هەردی لە لێدوانێکدا بۆ ماڵپەری سپی میدیا وتی" ئەمڕۆ سێشەممە جارێكی دیكە دۆسیەی دادگاییكردنی تۆمەتباران دواخرا و تا ئێستاش پۆلیس تۆمەتباران ئاگادارناکاتەوە کە كەسانی دیارن ‌و شوێنیشیان زانراوە".

پارێزەرەکە ئەوەشی‌ ئاشکراکردووە، "تۆمەتبارانی‌ کەیسەکە، كە پێشمەرگەن، تا ئێستا تەبلیغ نەكراون، موفاتەحەی هێزەكانی یەكەی ٧٠ی هێزی پێشمەرگەش كراوە، كەچی پۆلیس تەبلیغی تۆمەتبارەكان ناكەن."

ڕوونیشیکردووەتەوە، "ناو و شوێنی تۆمەتبارەكان زۆر دیار ‌و ئاشكران و پۆلیسی سلێمانی هەڵناسێت بە ئاگاداركردنەوەی تۆمەتبارانی هێرشكردنەكە کە ڕووداوەكە دەگەڕێتەوە و هەموو جارێك بە بیانوی ئاگادارنەكردنەوەی تۆمەتبارەكان دادگاییەكە دوادەخرێت."

لە ساڵی‌ ٢٠١١ و ماوەیەک دوای‌ بڵاوەپێکردنی‌ خۆپیشاندانەکانی‌ ١٧ی‌ شوبات، لەلایەن چەند کەسێکەوە هێرشکرایە سەر ڕۆژنامەنووس ئاسۆس هەردی‌، کە ئەوکاتە سەرۆکی کۆمپانیای ئاوێنەبوو کە رۆژنامەی ئاوێنەی دەردەکرد.




ئه‌م بابه‌ته ‌600 جار خوێنراوه‌ته‌وه‌‌

AM:12:08:22/05/2019