به‌ڕێوه‌به‌رایه‌تی پۆلیسی دارستان و ژینگه‌ی سلێمانی رایگەیاند، له‌سنووری پیره‌مه‌گرون زیاتر  450 دۆنم پوش و پاوان سووتان.

ئەمڕۆ چوارشەممە 19 ی حوزەیران، له‌ڕاگه‌یه‌نراوێكی به‌ڕێوه‌به‌رایه‌تی پۆلیسی دارستان و ژینگه‌ی سلێمانی کە وێنەیەکی دەست (سپی) کەوتووە، ڕایگەیاند" له‌ سنووری ناحیه‌ی پیره‌مه‌گروون و له‌ گوندی  یاڵانقۆز له‌ كاتی كاركردنی ده‌ڕاسه‌یه‌ك و بوونی كێشه‌یه‌ك تێیدا، ئاگرێك كه‌وته‌وه‌ و بووه‌ هۆی سوتانی نزیكه‌ی  450 دۆنم له‌ پوش و پاوان و په‌رێز".

ئەوەشخراوەتەڕوو، به‌هۆی ئه‌و ئاگره‌وه‌ زیاتر له‌ 20  دۆنم ده‌غڵ و دان و گه‌نمی جوتیاران و باخێكی  ترش و چواله‌ سووتاون.

ئاماژەبەوەشکراوە، دوای گه‌یشتنی مه‌فره‌زه‌كانی بنكه‌ی پۆلیسی دارستانی پیره‌مه‌گروون، و به‌ هاوكاری ئاگركوژێنه‌وه‌ی پیره‌مه‌گروون و خه‌ڵكی ناوچه‌كه‌، پاش دوو سه‌عات له‌هه‌وڵ و ماندوونێكی زۆر توانیان ئاگره‌كه‌ بكوژێنه‌وه‌ و كۆنتڕۆلی بكه‌ن و رێگه‌ له‌ زیاتر ته‌شه‌نه‌كردنی بگرن.