ئەمڕۆ ڕێوڕەسمی پێنجهەمین ساڵوەگەڕی داگیركردنی شنگال لە شاری دهۆك بە بەشداری نێچیرڤان بارزانی سەرۆكی هەرێمی كوردستان و مەسرور بارزانی سەرۆك وەزیرانی هەرێمی كوردستان دەستیپێكرد.
نێچیرڤان بارزانی ڕایگەیاند" ئەوەی پێویستبێت بۆ رزگارکردنی رفێندراوان دەیکەین و تاوەکو ئێستا دوو هەزار و 225 ژن و کچی ئێزدی رزگارکراون".
نێچیرڤان بارزانی راشیگه‌یاند، دوژمنان ده‌یانه‌وێت ئێزدییه‌كان له‌سه‌ر خاكی خۆیان نه‌مێنن و ده‌ربه‌ده‌ر بن، به‌ڵام ئێزدییه‌كان به هێز و بیروباوه‌ڕی خۆیان ده‌مێننه‌وه.
داواشیكرد سندووقێكی تایبه‌ت به ئاوه‌دانكردنه‌وه‌ی شنگال له‌لایه‌ن نه‌ته‌وه یه‌كگرتووه‌كان و كۆمه‌ڵگه‌ی نێوده‌وڵه‌تی دابمه‌زرێت، بۆ ئه‌و مه‌به‌سته‌ش ئاماده‌یی هه‌رێمی كوردستانی ده‌ربڕی به‌شداری تێدا بكات.
لەبارەی دۆخی شنگالیشەوە وتیشی" داواکارین ناکۆکییە سیاسییەکان نەبنە مایەی رێگری لە ئاوەدانکردنەوەی شنگال و کار لەسەر ئەوە دەکەین شنگال ببێتە پارێزگا".
لە ڕۆژی 3ی ئابی 2014 چەكدارەكانی داعش شارۆچكەی شنگال و ناوچەكانی دەوروپشتیان داگیركرد و بەهۆیەوە هەزاران بوونە قوربانی و دوێنێش پەرلەمانی کوردستان (3ی ئاب)ی پڕۆژەیاسای بە جینۆسایدناساندنی ئێزدییەكانی پەسەند كرد.