یەکێتی ناڕازییە لەو دەسەڵاتانەی دراوە بە جێگری سەرۆکی حکومەت و وەزیرەکانی


یەکێک لە خاڵەکانی کۆبوونەوەی دوێنێی مەکتەبی سیاسی یەکێتی تایبەت بووە بە وتوووێژ کردن لەسەر ئەو دەسەڵاتانەی مەسرور بارزانی دیارکردووە بۆ جێگری سەرۆکی حکومەت و وەزیرەکانی.

سەرچاوەیەکی ئاگادار لە یەکێتی نیشتیمانی کوردستان بە "سپی" ڕاگەیاند" لە کۆبوونەوەی دوێنێ ٢٠ ی ئەیلولی ٢٠١٩ کە لە سلێمانی سازکرا، یەکێک لەو خاڵانەی کە گفتوگۆی لەسەر کراوە ئەو دەسەڵاتانە بووە کە مەسرور بارزانی سەرۆکی حکومەتی دیاری کردووە بۆ جێگری سەرۆکی حکومەت و وەزیرەکانی.

سەرچاوەکەی "سپی" ئاماژەی بەوەکرد، کە یەکێتی ناڕازییە لەو دەسەڵاتانە، پێیوایە ئەو دەسەڵاتانەی لەسەردەمی کابینەکەی نێچیرڤان بارزانی درابوو بە قوباد تاڵەبانی و وەزیرەکانی کابینەی پێشوو زۆر زیاتر بووە لەم دەسەڵاتانەی ئێستا مەسرور بارزانی شۆڕی کردۆتەوە بۆ قوباد تاڵەبانی و وەزیرەکان. 

بەپێی ئەو زانیاریانە، مەکتەبی سیاسی یەکێتی ڕژدن لەسەر ئەو دەسەڵاتانەی دەدرێت بە قوباد تاڵەبانی و وەزیرەکان دەبێت پێداچوونەوەی بۆ بکرێت.

"سپی" زانیوێتی مەکتەبی سیاسی یەکێتی سوورن لەسەر ئەو هەڵوێستەی تا ئەو ئاستەی کار بگاتە هەڵپەساردنی کارەکانی جێگری سەرۆکی حکومەت و وەزیرەکانی یەکێتی لەم کابینەی ئێستای مەسرور بارزانیدا، ئەگەر پێداچوونەوە بەو دەسەڵاتانەدا نەکرێت.

لەگەڵ دروستبوونی کابینەی نوێ بەسەرۆکایەتی مەسرور بارزانی لیژنەیەکی دوو کەسی لە دکتۆر ئامانج ڕەحیم و دکتۆر ئومێد سەباح، لە ئەنجومەنی وەزیران پێکهاتبوو بۆ دیاریکردنی دەسەڵاتەکانی جێگری سەرۆک وەزیران.

دوێنێ مەکتەبی سیاسی یەکێتی نیشتیمانی کوردستان لە سلێمانی کۆبووەوە بۆ گفتوگۆ کردن لەسەر کۆمەڵێک پرسی هەنوکەیی، کە یەکێکیان پرسی دەسەڵاتەکانی نوێنەرانی یەکێتی لە کابینەی مەسرور بارزانیدا. 
 


ئه‌م بابه‌ته ‌2450 جار خوێنراوه‌ته‌وه‌‌

AM:10:28:21/09/2019