چۆنیەتی ئامادەكردنی پاستای پایزە

ئەم پاستایە تامێکی خۆشی هەیە و ڕەنگی لە پاییز دەچێت و پێکهاتەکەشی بەرهەمی میوەی پاییزە، ئەم ژەمە بۆ ٤ کەس دەبێت و زۆر ئاسانە و پێویستی بە  ١٠ خولەکە تا ئامادە دەبێت. 

سەرەتا دەبێت هەریسەی کودوەکە حازربکرێت، پێویستمان بە کودوێکی بچووکە ودەبێت لەت لەت بکرێت و لە تۆوەکەی ناوی پاک بکرێتەوە، ئێستا بەتوێکڵەوە دەخرێتە ناو سینیەکەوە و یەک تۆز ( نیو سم) ئاوی تێ دەکرێت و بە کاغەزی برژاندن دادەپۆشرێت و دەخرێتە ناو فڕنێکی ٢٢٠ پلەوە تا ئامادە دەبێت و توێکڵەکەی لادەبردرێت. 

پێکهاتەکان: 

٣٥٠ گرام سپاگێتی کوڵاو و ئامادەکراو

١ کوپ و نیو هەریسەی کودو

نیو کوپ لە ئاوی ماکەڕۆنیەکوڵاوەکە

نیو کوپ پەنیری پارمیزان

١/٤ کوپ شیری چەور

١/٤ کوپ کرێمی چێشت

١ دەنک سیری جنراو

   گەڵای رۆز ماری

 ٢ کەوچکی خواردن زەیتی زەیتون

١ کەوجکی بچووک سرکەی سپی

 بیبەری ڕەش

خوێ
 

ئامادەکردن:

لە کاتی کوڵانی ماکەڕۆنییەکە لە تاوەیەک بەجیا گەڵای رۆزمارییەکە لەناو ٢ کەوچک زەیتی زەیتوون سووردەکەینەوە، بەڵام نابێت گەڵاکە بسوتێت ، تەنها دەمانەوێت زەیتەکە تامی گەڵای رۆزماری بگرێت وکاتێک ڕەنگی تۆزێک گۆرا لەڕۆنەکە ‌هەڵی دەچنین. 

 

ئێستا هەریسەی کودوەکە دەکەینە ناو تاوەکە و تێکی دەدەین تاوەکو لەگەڵ ئەو زەیتەی ماوە باش تێکەڵ دەبێت. 

 

سیرە جنراوەکە و سرکەکە تێدەکەین و تێکی دەدەین و دوای یەک خولەک شیر و کرێمەکەی تێ دەکەین و تۆزێك خوێ و بیبەری رەشی بۆ زیاد دەکرێت و تێکیان دەدەین تاوەکو باش تێکەڵ دەبن و بەشێک لە پەنیری پارمیزانەکەی تێ دەکەین و تێکیان دەدەین تاوەکو هەموو پێکهاتەکە وەکو کرێمی لێ دێت. 

 

نیو کوپی ئاوی ماکەڕۆنییەکە بۆ سۆسی هەریسەی کرێمەکە زیاد دەکەین و تێکی دەدەین تا تێکەڵ دەبێت.
ئێستا ماکەڕۆنیەکە ئامادەبووە و تەواو لە ئاوەکەی دەپاڵیورێت و لەگەڵ هەریسەکە تێکەڵ دەکرێت و دخرێتە ناو دەفری پێشکەش کردن و بە کەمێک پەنیری پارمیزان دەرازێنرێتەوە. 

 


ئه‌م بابه‌ته ‌134 جار خوێنراوه‌ته‌وه‌‌

PM:05:50:19/10/2019