سوپای تورکیا و چەکدارانی ئۆپۆزسیۆن هێرشەکانیان دەستپێکردەوە

‌
سوپای تورکیا و چەکدارانی ئۆپۆزسیۆن هێرشەکانیان دەستپێکردەوە و چەند گوندێک داگیرکران.
 
بەگوێرەی زانیاریەکان سەرلەئێوارەی ئەمڕۆ چەکدارانی ئۆپۆزیسیۆنی سوریای بە پاڵپشتی تورکیا پێنج کیلۆمەتر لە شارۆچکەی تلتەمر نزیکبوونەتەوە، ترس و دڵەراوکێ لای دانیشتووانی ئەو ناوچەیە دروستبووە و ماڵەکانی خۆیان بەجێدەهێڵن. 

هاوکات فڕۆکە بەسەر ناوچەکەدا دەسووڕێتەوە و هێزەکانی سوپای سوریا لە شارۆچکەکە دەکشێنەوە و هێزەکانی سووریای دیموکراتیش لە ناوچەکە نابیندرێن، بەڵام ئاگر له‌ بڕێكی زۆری نه‌وت له‌  ته‌ل ته‌مر به‌رداوه‌، بۆ ئه‌وه‌ی ئاسمانی ناوچه‌كه‌ به‌ دووكه‌ڵ بته‌نرێت و فڕۆكه‌ جه‌نگییه‌كانی توركیا نه‌توانن ئامانجه‌كانیان بپێكن.

هاوکات ئاژانسی هه‌واڵی سانای سوریا بڵاویکردەوە شه‌ڕێكی سه‌خت له‌ نێوان سوپای سوریا و سوپای توركیا له‌ ناوچه‌ی "ته‌ل وه‌رد" له‌ ده‌وروبه‌ری سه‌رێ كانیێ روویدا و به‌هۆیه‌وه‌ ژماره‌یه‌كی زۆری دانیشتوانی ناوچه‌كه‌ ئاواره‌ بوون.

ئاژانسه‌ سوورییه‌كه‌ دووپاتیكرده‌وه‌، سوپای توركیا و گروپه‌ میلیشیا توندڕه‌وه‌كانی سه‌ر به‌ ئه‌نقه‌ره‌ هه‌ردوو گوندی مه‌حموودییه‌ و ده‌ربۆیان له‌ ده‌وروبه‌ری شاری سه‌رێ كانیێ داگیركردووە.

به‌گوێره‌ی چه‌ند شایه‌تحاڵێكیش، سوپای توركیا و ئه‌و گروپه‌ چه‌كدارانه‌ی سه‌ر به‌ ئه‌نقه‌ره‌ كه‌ له‌ ناوچه‌ی "عه‌نیقول هه‌وا" ده‌مێننه‌وه‌، به‌ تۆپ و هاوه‌ن خانوو و ماڵی دانیشتوانی گوندی ته‌ل وه‌ردیان له‌ باشووری رۆژهه‌ڵاتی سه‌رێ كانیێ كرده‌ ئامانج.

وه‌ك ئاژانسه‌ سوورییه‌كه‌ ئاماژه‌ی پێدا، سوپای سووریا 4 گوندی له‌ باشووری رۆژهه‌ڵاتی سه‌رێ كانیێ كۆنترۆڵ كردووه‌.

سه‌باره‌ت به‌ ژماره‌ی كوژراو و بریندارانی ئه‌و شه‌ڕه‌ش، ئاژانسه‌ سوورییه‌كه‌ هیچ زانیارییه‌كی رانه‌گه‌یاندووه‌.


PM:06:18:30/10/2019








ئەستێرەکان

Spee Media