پنتاگۆن ڤیدیۆی کوژرانی بەغدادی بڵاوکردوە

‌
وه‌زاره‌تی‌ به‌رگری‌ ئه‌مریكا "پنتاگۆن" ژماره‌یه‌ك وێنه‌ و گرته‌ی‌ ڤیدیۆیی ئه‌و ئۆپه‌راسیۆنه‌ی‌ هێزه‌كانی‌ وڵاته‌كه‌ی‌ بڵاوكرده‌وه‌ كه‌ تیایدا ئه‌بوبه‌كر به‌غدادی‌ كوژرا.

جه‌نه‌راڵ‌ كینیس ماكینزی‌ فه‌رمانده‌ی‌ فه‌رمانده‌یی ناوه‌ندی‌ ئه‌مریكا  له‌ كۆنگره‌یه‌كی‌ رۆژنامه‌وانیدا له‌ پنتاگۆن جه‌ختی‌ له‌وه‌ كرده‌وه‌ كه‌ پشكنینی‌ DNA سه‌لماندوویه‌تی‌ كه‌ ئه‌و كه‌سه‌ی‌ له‌ ئۆپه‌راسیۆنه‌كه‌دا كوژراوه‌، ئه‌بوبه‌كر به‌غدادی‌ سه‌رۆكی‌ رێكخراوی‌ تیرۆریستی‌ داعش.

له‌ كۆنگره‌ رۆژنامه‌وانییه‌كه‌دا جه‌نه‌راڵ‌ كینیس ماكینزی‌ گرته‌یه‌كی‌ ڤیدیۆیی بڵاوكرده‌وه‌ ئاماژه‌ی‌ به‌وه‌دا كه‌ شوێنی‌ خۆشاردنه‌وه‌ی‌ ئه‌بوبه‌كر به‌غدادی‌ بووه‌ له‌ پارێزگای‌ ئیدلبی‌ باكووری‌ رۆژهه‌ڵاتی‌ سوریا.

هەروەها وتی "له‌ ڤیدیۆیه‌كه‌دا ده‌ركه‌وتووه‌ كه‌ ئه‌و چه‌كدارانه‌ی‌ له‌گه‌ڵ‌ ئه‌بوبه‌كر به‌غدادی‌ بوون چۆن ته‌قه‌ له‌ هێزه‌ ئه‌مریكییه‌كه‌ ده‌كه‌ن، ئه‌بوبه‌كر به‌غدادی‌ خۆی‌ و دوو منداڵه‌ بچووكه‌كه‌ی‌ ته‌قانده‌وه‌ كه‌ ته‌مه‌نیان 12 ساڵ‌ زیاتر نه‌بوو".

دووپاتیشیكرده‌وه‌ كه‌ ئه‌بوبه‌كر به‌غدادی‌ هه‌وڵی داوه‌ له‌ڕێی‌ تونێلێكه‌وه‌ هه‌ڵبێت، به‌ڵام داخراوه‌ و هه‌وڵی‌ داوه‌ به‌ ته‌قه‌كردن به‌رگری‌ له‌ خۆی‌ بكات، به‌ر له‌وه‌ی‌ به‌ پشتێنێكی‌ بۆمبڕێژكراو خۆی‌ بته‌قێنێته‌وه‌.

راشیگه‌یاند كه‌ له‌ ئۆپه‌راسیۆنه‌كه‌دا جگه‌ له‌ ئه‌بوبه‌كر به‌غدادی‌ پێنج كه‌سی‌ تر له‌ داعش كوژراون كه‌ چواریان ئافره‌تن.

جه‌نه‌راڵ‌ كینیس ماكینزی‌ ئاشكراشیكرد كه‌ به‌پێی‌ ئه‌و یاسایانه‌ی‌ له‌ كاتی‌ ململانێی‌ سه‌ربازیدا په‌یڕه‌و ده‌كرێت، ته‌رمی‌ ئه‌بوبه‌كر به‌غدای‌ فڕێدراوه‌ته‌ ده‌ریاوه‌.
 


AM:09:29:31/10/2019








ئەستێرەکان

Spee Media