به‌مه‌به‌ستی پاراستنی ته‌ندروستی هاوڵاتیان و رێگریكردن له بڵاوبونه‌وه‌ی زیاتری ڤایرۆسی كۆرۆنا به‌ڕێوه‌به‌رایه‌تی پۆلیسی پارێزگای سلێمانی رێكاری نوێ ده‌گیرێته‌به‌ر و چەند بڕیاری نوێشی راگه‌یاند.
ئەمڕۆ شەممە لە ڕاگەیەندراوێکدا بەڕێوەبەرایەتی پۆلیسی پارێزگای سلێمانی ئاماژەی بەوەکردووە" بەمەبەستی پاراستنی تەندروستی هاووڵاتیان و رێگری كردن لە بڵاوبونەوەی زیاتری ڤایرۆسی كۆرۆنا لە سلێمانی، هاووڵاتیانی بەڕ‌ێز ئاگادار دەكەینەوە سبەینێ یەكشەممە (2020.3.15) رێكاری نوێ لەشاری سلێمانی دەگیرێتەبەر و داواكارین هەمولایەك پابەندبن پێوەی، بەپێچەوانەوە ناچارین رێكاری پێویست بەرامبەر سەرپێچیكاران بگرینەبەر".
1- كردنەوەی دوكانی نانەواخانە و فڕنی سەمون و ماركێتی گەڕەكەكان لەگەڵ دەرمانخانە و دوكانی سەوزە و میوە.
2- دلیڤەری و گواستنەوەی سەوزە و میوە بۆ ماڵەكان رێگەپێدراوە.
3- هاتنە دەرەوەی هاوڵاتیان بەپیادە بەمەبەستی كڕینی پێداویستی تەنها لە سنوری گەڕەكەكانی خۆیاندا دەبێت.
4- بۆ كڕینی پێداویستی مۆڵەتی شۆفێری و سەنەوەی ئۆتۆمبێل لەهاوڵاتیان وەردەگیرێت تا دەگەڕیتەوە.
5- تەنها رێگە بە هاتوچۆكردنی فەرمانگە خزمەتگوزارییەكانی ئاو و كارەبا و تەندروستی و شارەوانی لەگەڵ هێزە ئەمنییەكان رێگەپێدراون.
6- گەیاندنی نەخۆش بۆ نەخۆشخانەكان رێگەپێدراوە.