حکومەتی هەرێم سەرجەم هێزە ئەمنییەکانی خستە حاڵەتی ئامادە باشیەوە

وەزیری ناوخۆی حكومەتی هەرێمی كوردستان، بەبڕیارێك سەرجەم هێزە ئەمنییەكانی سەر بە وەزارەتی ناوخۆی خستە حاڵەتی ئامادەباشییەوە.

بەپێی فەرمانێكی وەزاری كە لەلایەن وەزارەتی ناوخۆی حكومەتی هەرێمی كوردستانەوە دەكرا”بە مەبەستی جێبەجێكردنی بڕیار و ڕێنماییەكانی حكومەتی هەرێم تایبەت بە بەرەنگاربوونەوەی ڤایرۆسی كۆرۆنا، بڕیارماندا بە:

 
دەقی راگەیاندراوەکە..

 
1- گشت هێزەكانی ئاسایشی ناوخۆ لە ئەفسەر و كارمەندانی سەر بە بەڕێوبەرایەتی گشتی دیوانی وەزارەت و بەڕێوبەرایەتی هێزەكانی ئاسایشی ناوخۆ و بەڕێوبەرایەتی گشتی ناوخۆ، بەڕێوبەرایەتییەكانی سەر بە بەڕێوبەرایەتی گشتی رەگەزنامەی هەرێمی كوردستان، بەڕێوبەرایەتی گشتیی پۆلیس، بەڕێوبەرایەتی گشتی بەرەنگاربوونەوەی توندوتیژی دژی ئافرەتان و خێزان، بەڕێوبەرایەتی پۆلیسی كارەبای هەرێم، بەڕێوبەرایەتی پۆلیسی دارستان و ژینگەی هەرێم، دادگای هێزەكانی ئاسایشی ناوخۆ/ یەك و دوو، دەستەی پشكنینی هێزەكانی ئاسایشی ناوخۆ، كۆلیژی پۆلیسی هەولێر و سلێمانی، بەڕێوبەرایەتی پۆلیسی مەشق و شیاندنی پارێزگای سلێمانی، سەر بە بەڕێوبەرایەتی گشتی پۆلیس، دەخرێنە حاڵەتی ئامادەباشییەوە، بە مەبەستی هاوكاریكردنی ئەو هێزانەی كە ئەركی جێبەجێكردنی رێنماییەكانی بەرەنگاربوونەوەی ڤایرۆسی كۆرۆنایان پێ سپێردراوە.


2- بەڕێوبەری ئەو فەرمانگانەی سەرەوە لە پارێزگا و ئیدارە سەربەخۆكان هەماهەنگی دەكەن لەگەڵ بەڕێوبەری پۆلیسی پارێزگا و ئیدارە سەربەخۆكان بۆ دابەشكردنی ئەركەكانیان و لە لایەن خودی ئەو بەڕێوبەرانە سەرپەرشتی دەكرێن، بە پێی رێنماییەكانی ژووری ئۆپراسیۆنەكانی پارێزگا و ئیدارە سەربەخۆكان.


3- ئەم فەرمانە لە رۆژی 2020/3/23 جێبەجێ دەكرێت.

 


ئه‌م بابه‌ته ‌2048 جار خوێنراوه‌ته‌وه‌‌

PM:09:40:23/03/2020