حکومەتی هەرێم: ٥ ی نیسان یاسای چاکسازی جێبەجێدەکرێت
هەرێم ٤٥% داهاتی لەدەستداوە

‌



سه‌رۆكی دیوانی ئه‌نجوومه‌نی وه‌زیرانی هه‌رێمی كوردستان، ئومێد سه‌باح، رایگه‌یاند " لە ٥ ی نیسانەوە یاسای چاکسازی جێەبەجێدەکەین" هەروەها دەشڵێت" لەم دۆخەدا هه‌رێمی كوردستان ٤٥% ی داهاتی له‌ده‌ستداوه و سه‌رۆكی حكومه‌تیش، سێ پرسی كردووه‌ته‌ ئه‌وله‌ویه‌تی كاره‌كانی، مووچه‌ و ئاسایشی خۆراك و ئاسایشی ته‌ندروستی هاووڵاتیان".


ئومێد سەباح سه‌رۆكی دیوانی ئه‌نجوومه‌نی وه‌زیرانی هه‌رێمی لە لێدوانێکی رۆژنامەوانیدا کە لە میدیاکانی نزیک پارتی بڵاوکراونەتەوە، دەڵێت " له‌ ٥ ی نیسانه‌وه‌ یاسای چاكسازی بۆ هێنانه‌دی دادپه‌روه‌ری جێبه‌جێ ده‌كرێت".


ئەو دەڵێت" كۆی گشتی داهاتی هه‌رێم ئه‌و كاته‌ 939 ملیۆن دۆلار بوو. به‌ڵام خه‌رجییه‌كان به‌م جۆره‌ بوون: 755 ملیۆن دۆلار بۆ مووچه‌ ته‌رخان ده‌كرا و عێراقیش 383 ملیۆن دۆلاری دابین ده‌كرد، واته‌ %51ی مووچه‌ی ده‌نارد. باقییه‌كه‌ی له‌ داهاتی ناوخۆ و فرۆشی نه‌وت پڕ ده‌كرێته‌وه"‌.


روونیشیكرده‌وه " له‌ هه‌رێمی كوردستان 1 ملیۆن و 234 هه‌زار كه‌س مووچه‌ له‌ حكومه‌ت وه‌رده‌گرێت. 205 ملیۆن دۆلاریش بودجه‌ی به‌گه‌ڕخستن بووه‌. له‌وه‌ش 35 ملیۆن دۆلار بۆ به‌گه‌ڕخستنه‌وه‌ی پڕۆژه‌كان ته‌رخان كراوه‌، مانگانه‌. واته‌: كۆی گشتی خه‌رجی: 995 ملیۆن دۆلار بووه‌. واته‌ له‌ مانگی دیسێمبه‌ر 56 ملیۆن دۆلار كورتهێنانمان هه‌بووه".


سه‌باره‌ت به‌ ژماره‌كان له‌ مانگی ئازاردا، ئومێد سه‌باح وتیشی " له‌ مانگی ٣دا ٤٧٩ ملیۆن دۆلارمان له‌ داهاتی كوردستان له‌ده‌ستداوه‌، كه‌ له‌ ٤٥% ی كۆی داهاته، ٢٤٤ ملیۆن دۆلاری داهاتی ناوخۆ دابه‌زیوه‌ بۆ ٦٠ ملیۆن دۆلار. داهاتی نه‌وت له‌ ٣٠٠ ملیۆن دۆلاره‌وه‌ دابه‌زیوه‌ بۆ ٦٠ ملیۆن دۆلار.


هه‌روه‌ها گوتی: ته‌نیا له‌م مانگه‌ ٣٨٣ ملیۆن دۆلاری عێراق و ٦٠ملیۆن دۆلاری ناوخۆ و ٦٠ ملیۆن دۆلاری داهاتی نه‌وت كۆی بكه‌ینه‌وه‌، ٥٢٠ ملیۆن دۆلار ده‌كات و ئێمه‌ ٤٧٩ ملیۆن دۆلارمان له‌ده‌ستداوه‌.


ئاماژه‌ی به‌وه‌شكرد، سه‌رۆكی حكومه‌تی هه‌رێمی كوردستان، مه‌سرور بارزانی، بۆ رێكخستنه‌وه‌ی خه‌رجییه‌كان، سێ ئه‌وله‌ویه‌تی هه‌بووه‌:


یه‌كه‌م: مووچه‌ دابین بكرێت.


دووه‌م: ئاسایشی خۆراك دابین بكرێت.


سێیه‌م: ئاسایشی ته‌ندروستی دابین بكرێت.


ئومێد سه‌باح لە کۆتاییدا جه‌ختیكرده‌وه‌ " تا ئه‌م له‌حزه‌یه‌ هیچ نیه‌تێك نییه‌ بۆ كه‌مكردنه‌وه‌ی مووچه‌. به‌ڵێن ده‌ده‌ینه‌ خه‌ڵكی كوردستان به‌ شه‌فافیه‌ت ئه‌و داهاته‌ی دێته‌ ده‌ستمان ئه‌وله‌ویه‌تی بۆ مووچه‌یه‌. به‌ڵام له‌ ٥ ی نیسانه‌وه‌ یاسای چاكسازی بۆ هێنانه‌دی دادپه‌روه‌ری جێبه‌جێ ده‌كرێت".
 


PM:11:43:31/03/2020








ئەستێرەکان

Spee Media