بڕیارە ئەمڕۆ یەكشەممە، جارێكی تر شاندەكەی هەرێمی كوردستان بگەڕێتەوە بەغدا و بەردەوامی بە گفتوگۆكان بدەن.
ئەحمەد سەفار، بڕیارده‌ری لیژنه‌ی دارایی له ئه‌نجومه‌نی نوێنه‌رانی عێراق بۆ ماڵپەڕی فەرمی "پارتی" رایگەیاندووە" ئه‌مڕۆ جارێكی دیكە شاندەكەی هەرێم دەچێتەوە بەغدا و درێژە بە دانوستانەكان دەدەن".
هۆكارەكەشی بۆئەوەگەڕاندووەتەوە، بەغدا داوای هەندێك زانیاری لەبارەی نەوت و داهات لە هەرێم كردووە، بۆیە ئەمجارە دەیانەوێت لەسەر كۆی كێشەكان بگەنە رێككەوتن و تەنها پرسی مووچە نەبێت.
ئەوپەرلەمانتارە بۆ ماڵپەڕی فەرمی حزبەكەی ئەوەشیخستووەتەڕوو: ئەگەر رێككەوتن بكرێت، پێویستە بێتە پەرلەمان بۆ ئەوەی دەنگی لەسەر بدرێت و ببێتە بڕیار، كە ئەمەش رەنگە بكەوێتە دوای پێكهێنانی حكومەتی نوێ، كە بڕیارە ئەم هەفتەیە دەنگی لەسەر بدرێت و ئەمەش پێویستی بە رەزامەندیی هەموو فراكسیۆنەكان هەیە.
رونیشیكردووەتەوە، حكومەتی هەرێم دەیەوێت كێشەكە بە یەكجاری چارە بكرێت و ساڵانە دووبارە نەبێتەوە، چونكە ناكرێت ساڵانە ئەو كێشەیە دووبارە ببێتەوە، بۆیە چاوەڕێ دەكرێت بگەنە رێككەوتنی كۆتایی.
سەفار ئەوەشی وتووە، شاندەکەی هەرێم تەکنیکییە و مەبەستی سەرەکی گفتوگۆکانیش رێککەوتنە لەگەڵ بەغدا لەبارەی نەوت و مووچەی هەرێمەوە.
لە ماوەی هەفتەی رابردوو شاندێكی هەرێمی كوردستان بەسەرۆكایەتی قوباد تاڵەبانی، جێگری سەرۆكی حكومەت رۆشتنە بەغدا بۆ گفتوكۆكردن لە بارەی رێككەوتنی هەرێم و بەغداو ناردنی مووچەی فەرمانبەرانی هەرێمی كوردستان و رۆژی ١ی ئایاری ٢٠٢٠ گەڕانەوە و دوێنێش كۆبوونەوەی ئەنجومەنی وەزیران بەڕێوەچوو.