لە سنووری پارێزگای سنەی رۆژهەڵاتی کوردستان، شەڕ لە نێوان سوپای پاسدارانی کۆماری ئیسلامی ئێران و هێزێکی کوردییدا روویدا و هەتا ئێستا شەڕەکە بەردەوامە.
ڕێكخراوی مافی مرۆڤی هەنگاو لە ڕاگەیەنراوێكدا ئاماژەی بەوەكردووە" ئەمڕۆ شەممە تێكهەڵچوونێكی چەكداری لە بەرزاییەكانی كوێستانی چلچەمەی دیواندەرە لە نزیك گوندی شاقەڵا لەنێوان هێزەكانی سوپای پاسداران و هێزێكی كوردستانی هاتۆتە ئاراوە و هێشتا درێژەی هەیە و تۆپخانەكانی سوپا خەریكە ئەو ناوچانە بوردمان دەكەن".
ڕاشیگەیاندووە" كۆپتەرەكانی سوپای پاسداران بەردەوام بەسەر ئاسمانی ناوچەكەدا دەسوڕێنەوە و تا ئێستا هیچ زانیارییەك لەسەر ژمارەی كوژراو و بریندارەكان لەبەردەستدا نییە".
ڕۆژی سێ شەممەی هەفتەی ڕابردووش هەر لەو شوێنە تێكهەڵچوونێكی چەكدارانە هاتبووە ئاراوە، كە لە ئەنجامدا سێ ئەندامی سوپای پاسداران كوژران.