سەرۆكایەتیی یەكێتیی نیشتمانیی كوردستان لە یادی کۆچی دوایی رێکخەری گشتی بزووتنەوەی گۆڕان نەوشیروان مستەفادا دەڵێن" کاردەکەین بۆ دروستکردنی سەرکردایەتیەکی هاوبەشی یەکێتی و گۆران".
لە پەیامێکدا بەبۆنەی سێهەمین ساڵیادی کۆچی دوایی نەوشیروان مستەفا رێکخەری گشتی بزووتنەوەی گۆرانەوە، سەرۆکایەتی یەکێتی نیشتمانی کوردستان جەخت لەسەر " دوا هەنگاوی سیاسیی مام جەلال و كاك نەوشیروان دەکەنەوە، کە كاركردن بووە بۆ دروستكردنی سەركردایەتیی هاوبەشی یەكێتی و گۆڕان. ئەمڕۆ ئێمە دریژەدان بەو هەنگاوه، بە ئەركێكی سەرەكی خۆمان دەزانین و خەباتی بۆ دەكەین".
دەقی پەیامەكە...
ئەمڕۆ ساڵیادی كۆچی دوایی سەركردەیەكی قارەمانی كوردستانە.
لەم یادەدا سەری رێز و وەفا بۆ هزر و خەبات و قەڵەمی نیشتمانپەروەرێك دادەنەوێنین، كە بەدەم رێگای سەخت و دووری تێكۆشانەوە، گوڵچنی كولتوور و ئەدەب و مێژووی شۆڕشی كوردستانی كردووە. دوای خۆیشی، گەنجینەیەكی گەورەی سیاسی، میژوویی، كۆمەڵایەتی، و زمانەوانی بۆ جێهێشتووین.
یەكێتیی نیشتمانیی كوردستان، هەمیشە بە چاوی وەفادارییەوە دەڕوانێتە خەباتی كاك نەوشیروان و هەڤاڵەكانی لەناو یەكێتی، كە لە پێناو ئازادی و دیموكراسی و دادپەروەری و مافی چارەی خۆنووسیندا، شۆڕشی نوێی گەلی كوردستانیان هەڵگیرساند.
ئەمڕۆ و نزیك بە نیو سەدە دوای ئەو رۆژگارە، كوردستان لە هەمووكات زیاتر پێویستی بە سیاسەتی حەكیمانەی مام جەلال و راشكاویی كاك نەوشیروانە و جێگەی خاڵیی ئەم دوو هاوڕێیەی خەبات، بە روونی لە تانوپۆی كوردەواریدا هەستی پێدەكریت.
لە یادمانە دوا هەنگاوی سیاسیی مام جەلال و كاك نەوشیروان، كاركردن بووە بۆ دروستكردنی سەركردایەتیی هاوبەشی یەكێتی و گۆڕان. ئەمڕۆ ئێمە دریژەدان بەو هەنگاوه، بە ئەركێكی سەرەكی خۆمان دەزانین و خەباتی بۆ دەكەین.
بەو هیوایەی یەكخستنی ریزەكانمان لە پێناو خزمەتكردنی شایستەی خەڵكی كوردستان، رۆحی ئەوان و سەرجەم شەهید و تێكۆشەرانی ئەم رێبازە ئاسوودە بكات.
سەرۆكایەتیی یەكێتیی نیشتمانیی كوردستان