به‌ڕێوه‌به‌رایه‌تی كاره‌بای سلێمانی ئاگاداری هاوڵاتیانی گه‌ڕه‌كی به‌ختیاری ده‌كاته‌وه‌، سبەی دووشه‌ممه‌ بۆ ماوه‌ی پێنج كاتژمێر كاره‌بای نیشتمانی و مۆلیده‌یان نابێت، به‌هۆی به‌ستنی پێوه‌ری زیره‌كه‌وه‌.
 
بەگوێرەی راگەیەندراوێكی بەڕێوەبەرایەتی كارەبای سلێمانی، لیژنەی سەرپەرشتیاری پرۆژەی تۆڕی زیرەكی كارەبا ئاگاداری دانیشتوانی گەڕەكی ( بەختیاری- بەرانبەر شاری جوان) دەكاتەوە، بەتایبەت ئەو ماڵانەی دەكەونە سەر فیدەری(248)، رۆژی دووشە‌ممه‌ (27/7/2020) پێوه‌ری زیره‌كی  كاره‌بایان بۆ ده‌به‌سترێت، بەو هۆیەوە لەكاتژمێر 7:00ی سەرلەبەیانی تاوەكو 12:00ی نیوەڕۆ، دانیشتوانی گەڕەكی بەختیاری كارەبای نیشتمانی و موەلیدەیان نابێت. 

كارەبای سلێمانی راشیگەیاندووە" بەستنی پێوەرەكە بێ بەرامبەر و هیچ بڕە پارەیەك لە هاوڵاتی وەرناگیرێت و خەرجییەكەی لەسەر حكومەتە".

ئەوەشی خستووەتەڕوو: لە پێناو پاراستنی ئامێرە كارەباییەكانیان پێش لێدانەوەی كارەبا بۆ یەكەمجار هەموو ئامێرە كارەباییەكانیان بكوژێننەوە و دواتر یەك لە دوای یەك هەڵیان بكەنەوە.