ئەمڕۆ چوار شەممە ژووری ئۆپەراسیۆنی ئیدارەی ڕاپەڕین كۆبووەوە و تێیدا نۆ بڕیاری تایبەت بە دۆخی كۆرۆنا و ئامادەكارییەكان بۆ جەژنی پیرۆزی قوربان دەركرد و داوا لە مامۆستایانی ئاینی دەكات كە لە پێناو ڕێگرتن لە تەشەنەكردنی ڤایرۆسی كۆرۆنا خۆیان بەدووربگرن لە مەراسیمەكانی پرسە و سەرقەبران و نوێژی جەژن.
دەقی راگەیەنراوەکە:
کاتژمێر ( 9:30 ) ی بەرەبەیانی ئەمڕۆ چوارشەممە رێكەوتی ( 29 / 7 / 2020 ) لە دیوانی ئیدارەی را پەرین بە سەرپەرشتیی بەڕێز سەرپەرشتیاری ئیدارەی راپەرین و ئامادەبوونی بەڕێزان ئەندامانی ژووری ئۆپەراسیۆنی ئیدارەی راپەرین بۆ رووبەرووبوونەوەی پەتای كۆڕۆنا كۆبوونەوەیەكی تایبەتی سەبارەت بە رێكار و ئامادەكاریی رۆژانی جەژنی قوربانی پیرۆز و میكانیزمی جێبەجێكردنی بەیانی ژمارە ( 44 ) ی وەزارەتی ناوخۆ ساز كرد ..
لە كۆبوونەوەكەدا رەوشی تەندروستیی سنووری ئیدارەی راپەرین و بەردەوامیی چالاكیی و تەوژمی پەتاكە و مەترسیەكانی لە سەر كۆی ژیانی كۆمەڵگا و تاك بە تاكی خەڵك خرایە بەر باس و لێكۆڵینەوە و لە سۆنگەی هەست كردن بە لێپرسراوێتیی ئایینی و نەتەوەیی و ئەخلاقییەوە لە بەرامبەر گیان و ژیان و تەندروستیی هاووڵاتیانی خۆشەویستی ناوچەكەمان و بە لەبەرچاوگرتنی ئاماری هەڵكشاوی رۆژانەی ژمارەی تووشبوو و قوربانیانی ئەو پەتا نەفرەتییە بڕیاردرا بە :
یەكەم / سەرجەم بڕگە و خاڵەكانی بەیانی ژمارە ( 44 ) ی وەزارەتی ناوخۆ تایبەت بە داخستن و قەدەغەی كرانەوەی شوێن و محەلەكان جێبەجێبكرێن
.
دووەم / داوا لە مامۆستایانی ئایینیی دەكەین هەروەك رابردوو ئیسپاتیان كرد كە هاوكارێكی بێدرێغی ئیداراتی ناوچەكەن لە جێبەجێ كردنی رێنمایی و بڕیارەكانی پەیوەست بە بەرژەوەندیی گشتی هاووڵاتیان و تەندروستی خەڵكەوە، بە هەمان گیانی دڵسۆزی و بەرپرسیارێتییەوە هاوكارمان بن لە رێنوێنی و هوشیاركردنەوەی هاووڵاتیان بۆ پابەندبوونیان بە رێكارەكانی خۆپارێزی و تەندروستییەوە لە رۆژانی جەژندا و خۆدوورگرتن لە هەموو چەشنەكۆڕ و كۆبوونەوەیەك كە ببێتە هۆی قەرەباڵغی و جەنجاڵیی و بەریەك كەوتنی ناپێویست وەك مەراسیمەكانی پرسە و سەرقەبران و نوێژی جەژن.
سێیەم / بەڕێوەبەرایەتی ئاوی راپەرین ئەوپەڕی هەوڵ و تەقەلاكانی خۆیان چڕدەكەنەوە تا لە رۆژانی جەژن و پشوودا ئاوی خواردنەوە بۆ سەرجەم شاروشارۆچكەكان دابین بكەن و بۆ ئەمەش میكانیزمی گونجا و و كاری پێویست ئەنجام دەدەن .
چوارەم / بەڕێوەبەرایەتی گشتی تەندروستی راپەرین و بەڕێوەبەرایەتی كارەبای راپەرین میكانیزمی گونجاو بۆ خەفارەتی رۆژانی جەژن و پشوو دادەنێن بۆ بەردەوامیی خزمەتگوزارییەكانیان .
پێنجەم / بەڕێوەبەرایەتی شارەوانیەكان و كۆمپانیای پاككردنەوە بۆ پاك راگرتنی شار و شارۆچكەكان و پاككردنەوەی پاشماوەی ( قوربانی ) كاری خۆیان ئەنجام دەدەن .
شەشەم / بەڕێوەبەرایەتییەكانی پۆلیس و ئاسایش و هاتوچۆ و سەرجەم دامودەزگا ئەمنییەكان خشتەی ئەرك و پلانی كاری رۆژانی جەژنیان بە تۆكمەیی جێبەجێ دەكەن .
حەوتەم / بەڕێوەبەرایەتی بەرگری شارستانی راپەرین تیمەكانی غەواص و دەربازكردن ساز و ئامادە دەكەن لە بەنداوی سەروچاوە و دەربەند .
هەشتەم / داوا لە سەرجەم هاووڵاتیانی خۆشەویست دەكەین بۆ پاراستنی تەندروستی خۆیان و خزم و كەس و كار و ئازیزانیان بە هەموو شێوەیەك خۆیان لەسەردان و هاتوچۆ و هەرچەشنە بەریەك كەوتن و قەرەباڵغییەك بەدوور بگرن .
نۆیەم / سەرجەم یەكە كارگێڕی و بەڕێوەبەرایەتی و فەرمانگەكانی سنووری ئیدارەمان ئاگادار دەكەینەوە كە لە دوای پشووی جەژن ئەو لیژنەیەی لە بەیانی ژمارە ( 44 ) ی وەزارەتی ناوخۆدا ئاماژەی پێدراوە كارا دەكرێت بەمەبەستی چاودێریی رەوشی جێبەجێ كردنی رێنماییە تەندروستییەكان لە فەرمانگەكاندا و پێویستە ئامادەكاریی تەواو بكەن لەم بابەتەوە …
لەگەڵ هیوای سەلامەتی و جەژن و پشوویەكی خۆش بۆ هەموو لایەك ….
هیوا قەرەنی عبداللە
سەرپەرشتیاری ئیدارەی راپەرین
سەرۆكی ژووری ئۆپەراسیۆنی ئیدارەی راپەرین بۆ رووبەرووبوونەوەی پەتای كۆڕۆنا
29 / تەممووزی 2020