دوای ئەوەی پۆلیسی هەولێر لە ڕووداوێکی کوشتن ئاگادار کرانەوە، تیمەکانی بەشی پۆلیسی عەنکاوە سێ تۆمەتباریان گرت.
بەڕێوەبەرایەتی پۆلیسی پارێزگای هەولێر لە ڕاگەیەندراوێکدا ئاشکرایکرد: دوای ئاگاداركردنەوەی بەشی پۆلیسی عەنكاوە بە بوونی ڕووداوێكی كوشتن لە گوندی (سورخان)، تیمێكی لێكۆڵینەوە لە بنكەی پۆلیسی توڕەق پێك هێندرا و گەیشتنە شوێنی ڕووداو، دوای گەیشتنیان بۆ شوێنی ڕووداوەكە، دەركەوت هاوڵاتییەك بە ناوی (عەزیز حەسەن عوسمان) لەلایەن سێ تۆمەتبارەوە بە ئۆتۆمبێل خۆیان پی كێشاوە و تەقەیان لێكردووە و لە ئاكامدا گیانی لە دەستداوە.
بەپێی راگەیەنراوەكە، پۆلیس توانی بە ماوەی كەمتر لە دوو كاتژمێر تۆمەتباران بە ناوەكانی (س.م.ع- س.س.م.- م.س.م.) دەستگیر بكەن، هەر سێ تۆمەتبارەكە دوای دەستگیركردنیان دانیان نا بە تاوانەكەیاندا كەوا لەسەر كێشەی زەوی بووەتە دەمەقاڵەیان و لە ئاكامدا تەقە لە نێوانیاندا ڕوویداوە و بەو هۆیەوە گوللـەیەك بەر ناوبراوی سەرەوە كەوتووە و لە شوێنی ڕووداو گیانی لەدەستداوە، هەروەها تۆمەتبار (س.س.م)ـیش زامدار بووە.
پۆلیسی هەولێر ئەوەشی خستۆتەڕوو: کە پەڕاوی لێكۆڵینەوە بۆ هەر سێ تۆمەتبارەكە ڕێكخراو دادوەر بڕیاریدا بە بەندكردنی هەرسێكیان بەپێی ماددە (٤٠٦) لە یاسای سزادان.