مسته‌فا كازمی‌و نێچیرڤان بارزانی پەیوەندی هەرێم‌و بەغدا تاوتوێ ده‌كه‌ن

‌


له‌ یه‌كه‌م وێستگه‌ی سه‌ردانیدا بۆ به‌غدا، پێشنیوه‌ڕۆی ئه‌مڕۆ چوارشه‌ممه‌ ٢ی ئەیلول، نێچیرڤان بارزانی سه‌رۆكی هه‌رێمی كوردستان، له‌گه‌ڵ مسته‌فا كازمی، سه‌رۆ‌ك وه‌زیرانی عێراقی فیدرال كۆبووه‌وه‌.


بەپێی راگەیاندنی سەرۆکایەتی هەرێم، له‌ كۆبوونه‌وه‌كه‌دا دۆخی سیاسی و ئه‌منیی عێراق، په‌تای ڤایرۆسی كۆرۆنا و لێكه‌وته‌كانی به‌تایبه‌تی له‌ بواری ئابووریدا و هه‌وڵه‌كانی به‌ره‌نگاربوونه‌وه‌ی، به‌رده‌وامیی گفتوگۆی هه‌ولێر ـ به‌غدا بۆ چاره‌سه‌ركردنی كێشه‌كان، مه‌ترسییه‌كانی تیرۆر و جموجووڵه‌كانی داعش، دۆخی ناوچه‌كه‌ به‌گشتی و چه‌ند پرسێكی جێی بایه‌خی هه‌ردوولا تاوتوێ كران.


له‌ كۆبوونه‌وه‌كه‌دا هه‌ردوولا جه‌ختیان له‌ گرنگی و پێویستیی كاری پێكه‌وه‌یی و هاوبه‌شیی هه‌موو پێكهاته‌ و لایه‌نه‌كان بۆ ڕووبه‌ڕووبوونه‌وه‌ی ته‌حه‌دییه‌كان و تێپه‌ڕاندنی قه‌یرانه‌كان كرده‌وه‌. هه‌ردوولا كۆك بوون له‌سه‌ر گرنگیی هاریكاری و هه‌ماهه‌نگیی پێشمه‌رگه‌ و سوپا بۆ به‌ره‌نگاربوونه‌وه‌ی مه‌ترسییه‌كانی تیرۆر و دڵنیابوون له‌ نه‌هێشتنی داعش.


هەروەها ده‌رباره‌ی كێشه‌كانی هه‌ولێر ـ به‌غداش، نێچیرڤان بارزانی و سه‌رۆك وه‌زیران مسته‌فا كازمی داكۆكییان له‌ به‌رده‌وامیی گفتوگۆكان بۆ گه‌یشتن به‌ ڕێككه‌وتنێكی گشتگیری یه‌كجاری بۆ چاره‌سه‌ركردنی ته‌واوی كێشه‌كان له‌سه‌ر بنه‌مای ده‌ستوور و هاوكاریی نێوان حكوومه‌تی فیدرال و حكوومه‌تی هه‌رێمی كوردستان بۆ تێپه‌ڕاندنی قه‌یرانه‌كان كرده‌وه‌. 


وەک راگەیاندنی سەرۆک کۆمار خستوویەتەڕوو،  كازمی ئاماژه‌ی به‌ گرنگیی بنیاتانه‌وه‌ی متمانه‌ كرده‌وه‌ و ڕایگه‌یاند پێشتر له‌ بابه‌تی مامه‌ڵه‌مه‌كردن له‌گه‌ڵ كێشه‌كان كه‌موكوڕی هه‌بووه و هیوای خواست هه‌ردوولا بتوانن به‌ تێڕوانینێكی تازه‌ی هاوبه‌ش هه‌نگاو بۆ چاره‌سه‌ری بنێن. لای خۆیه‌وه‌ ‌ نێچیرڤان بارزانییش دووپاتی كرده‌وه‌ كه‌ چاره‌سه‌ركردنی بنچینه‌یی و یه‌كجاریی كێشه‌كان له‌ به‌رژوه‌ندیی ته‌واوی عێراقدایه‌ و سه‌قامگیری بۆ وڵات ده‌گه‌ڕێنێته‌وه‌.


په‌یوه‌ندییه‌كانی عێراق و هه‌رێمی كوردستان له‌گه‌ڵ وڵاتانی دراوسێ، پاراستنی سنووره‌كان و سه‌روه‌ریی عێراق، سه‌ردانی سه‌رۆك وه‌زیران بۆ واشنتۆن و كۆبوونه‌وه‌ی له‌گه‌ڵ سه‌رۆكی ئه‌مه‌ریكا، سه‌ردانی سه‌رۆكی فه‌ڕه‌نسا بۆ عێراق و ئه‌ركی هاوپه‌یمانیی نێوده‌وڵه‌تیی دژی داعش، ته‌وه‌رێكی دیكه‌ی كۆبوونه‌وه‌كه‌ بوو. سه‌رۆك نێچیرڤان بارزانی ئاما‌ژه‌ی به‌وه‌ دا كه‌ كۆمه‌ڵگه‌ی نێوده‌وڵه‌تی ئاماده‌یه‌ هاوكاری و پشتیوانی له‌ عێراق بكات، گرنگه‌ عێراقیش بتوانێت سوود له‌و ده‌رفه‌ته‌ ببینێت.
 


PM:12:42:02/09/2020








ئەستێرەکان

Spee Media