بەڕێوەبەرایەتی گشتی تەندروستی سلێمانی رایگەیاند، " لە ٢٤ کاتژمێری رابردودا ١١ تووشبووی کۆرۆنا گیانیان لەدەستدا".
لە راگەیاندنێکدا بەڕێوەبەرایەتی گشتی تەندروستی سلێمانی ئەوەی خستەڕوو "لە دوێنێوە ٤٢ تووشبووی نوێی کۆرۆنا لە نەخۆشخانە خراونەتە ژێر چاودێرییەوە و کۆی گشتی توشبوان لە نەخۆشخانەکانی ئاسا، شەهید ئاسۆ، شەهید هێمن و شەهید تاهیر والی بەگ گەیشتە ١٩٥ توشبوو".
تەندروستی سلێمانی ئاشکراشی دەکات ٣١ نەخۆشیش چاکبوونەتەوە و نەخۆشخانەیان جێهێشتوە.
هەروەها هاتووە " ٣٦ کەسیش لە ژێر چاودێری چڕ (ICU) دان".
هەروەها راگەیاندنی تەندروستی سلێمانی باس لەوەش دەکات " ١١تووشبووی کۆرۆنا گیانیان لەدەستداوە، کۆی گشتی گیان لەدەستدانیش گەیشتە ٨١٦ کەس بە کۆرۆنا گیانیان لەدەستداوە".
تا ئێستا لە هەرێمی كوردستان ٤٣ هەزار و ٩٨٩ كەس تووشی كۆرۆنا بوون، ٢٨ هەزار و ١٥٣ كەس چاكبونەتەوە و ١٥٩٢ تووشبووش گیانیان لەدەستداوە."