وەزارەتی دارایی عێراق هۆكاری دواكەوتنی موچەی مانگی تشرینی یەكەمی مووچەخۆرانی عێراقی ڕاگەیاند.
لە ڕاگەیەنراوێكیدا وەزارەتی دارایی ئاماژە بۆ ئەوە دەکات، هەفتەی ڕابردوو لێدوانی زۆر سەبارەت بە دواكەوتنی موچە و هۆكارەكانی دراوە، وەزارەتی دارایش چەندین جار جەختی كردووەتەوە داهاتی ئێستای حكومەت بە هۆی دابەزینی بەهای نەوت و بڕیارەكانی ئۆپیك سەبارەت بە كەمكردنەوەی ئاستی بەرهەم، بەشی خەرجییەكانی حكومەت ناكات.
لە ڕاگەیەنراوەكەدا هاتووە، " داهاتی نەوت تەنها لەسەدا پەنجای خەرجیەكانی حكومەت دابین دەكات و پێشبینیش دەكرێت ڕەوشەكە درێژە بكێشێت".
دەربارەی یاسای قەرزكردنیش وەزارەتی دارایی عێراق ڕایگەیاندووە " لیژنەی دارایی داوای لە ئەنجومەنی نوێنەران كردووە ڕێگە بە قەرزكردنی بڕی ٤١ ترلیۆن دینار بدات بۆ پڕكردنەوەی ئەو كورتهێنانەی لە تەمویلكردنی موچە و شایستە داراییەكان و پڕۆژەكانی وەبەرهێنانی ساڵانی ٢٠١٩ و ٢٠٢٠ دروستبووە و لە ئەگەری پەسەندكردنیدا زۆرێك لەو كێشانە چارەسەر دەبن".