یەکێتی و پارتی راگەیاندنێکیان بڵاوکردەوە

‌

دوای شەڕێکی میدیای چەند مانگەی نێوانیان، ئەمڕۆ دوای چەند کاتژمێرێک لە کۆبوونەوەی مەکتەبی سیاسی یەکێتی و پارتی بەسەرپەرشتی نیچیرڤان بارزانی سەرۆکی هەرێم راگەیاندنێکیان بڵاوکردەوەو جەختیان لەکاری هاوبەش، پاراستنی قەوارەی هەرێم و لامەرکەزیەت کردەوە.
 
دەقی راگەیەنراوەکە:


ئه‌مڕۆ دووشه‌ممه ٢٠٢٠/٩/١١ له‌ سه‌رۆكایه‌تیی هه‌رێمی كوردستان، به‌ سه‌رپه‌رشتیی به‌ڕێز نێچیرڤان بارزانی، سه‌رۆكی هه‌رێمی كوردستان و به‌ ئاماده‌بوونی به‌ڕێز بافڵ تاڵه‌بانی، هاوسه‌رۆكی یه‌كێتیی نیشتمانیی كوردستان، پارتی دیموكراتی كوردستان و یه‌كێتیی نیشتمانیی كوردستان كۆبوونه‌وه‌.


له‌ كۆبوونه‌وه‌كه‌دا وێڕای به‌خێرهێنان و سوپاسكردنی شاندی هه‌ردوولا له‌لایه‌ن به‌ڕێز سه‌رۆكی هه‌رێمی كوردستانه‌وه‌، تیشك خرایه‌ سه‌ر بارودۆخی سیاسی به‌گشتی و بارودۆخی عێراق و هه‌رێمی كوردستان و ئه‌و گیروگرفتانه‌ی به‌رۆكی خه‌ڵكی هه‌رێمی كوردستانیان گرتووه‌، به‌تایبه‌تی له‌ڕووی ئابووری و داراییه‌وه‌ كه‌ به‌هۆی لێكه‌وته‌كانی بڵاوبوونه‌وه‌ی ڤایرۆسی كۆرۆناوه‌، جیهان و عێراق و هه‌رێمی كوردستانی گرتووه‌ته‌وه‌.


به‌ڕێزیان جه‌ختی له‌ گرنگیی كاری هاوبه‌شی نێوان سه‌رجه‌م لایه‌نه‌ سیاسییه‌كانی هه‌رێمی كوردستان، به‌تایبه‌تی نێوان پارتی و یه‌كێتی كرده‌وه‌ و ئاماده‌ییی سه‌رۆكایه‌تیی هه‌رێمی كوردستانی نیشان دا بۆ پاڵپشتی و هاوكاریی سه‌رخستنی كاری پێكه‌وه‌یی و هه‌ماهه‌نگیی نێوان هه‌موو لایه‌نه‌كان.


دواتر شاندی هه‌ردوولا گفتوگۆی ڕاشكاوانه‌ و به‌رپرسانه‌یان له‌سه‌ر كۆی پرسه‌كان كرد و دووپاتی به‌رپرسیاریه‌تیی هاوبه‌شیان به‌رامبه‌ر پرۆسه‌ی سیاسی و حوكمڕانی له‌ هه‌رێمی كوردستان كرده‌وه‌. هه‌ردوولا كۆك بوون كه‌ پێویسته‌ پێكه‌وه‌ له‌گه‌ڵ لایه‌نه‌كانی دیكه‌ی هه‌رێمی كوردستان هه‌نگاوی جددی و كرده‌یی بنێن بۆ چاره‌سه‌ركردنی گرفته‌كانی نێوانیان و هه‌موو تواناكانیان بخرێنه‌ گه‌ڕ بۆ ڕووبه‌ڕووبوونه‌وه‌ی ئه‌م بارودۆخه‌ و پشتیوانیی دامه‌زراوه‌كانی هه‌رێمی كوردستان بۆ خزمه‌تكردنی هاووڵاتیان.


بارودۆخی ئه‌منیی هه‌رێمی كوردستان و ڕێزگرتن له‌ قه‌واره‌ی سیاسی و ده‌ستووریی هه‌رێم ته‌وه‌رێكی دیكه‌ی كۆبوونه‌كه‌ بوو. هه‌ردوولا كۆك بوون كه‌ پاراستنی ئارامی و سه‌قامگیریی هه‌رێمی كوردستان، ئه‌ركی  هه‌موو لایه‌كه‌.


هه‌ردوولا پشتگیریی خۆیان بۆ ئاماده‌كارییه‌كانی حكوومه‌تی فیدراڵ و لایه‌نه‌ په‌یوه‌نداره‌كان بۆ سه‌رخستنی هه‌ڵبژاردنی پێشوه‌خته‌ی عێراق دووپات كرده‌وه‌ و له‌م ڕووه‌وه‌ هه‌ماهه‌نگی و هاوكاریی نێوان نوێنه‌رانی هه‌رێمی كوردستان له‌ به‌غدا به‌رز هه‌ڵسه‌نگێنرا و دووپاتی به‌رده‌وامیی ئه‌و هه‌ماهه‌نگییه‌ كرایه‌وه‌.


له‌ ته‌وه‌رێكی دیكه‌ی كۆبوونه‌وه‌كه‌دا هه‌ڵسه‌نگاندن بۆ جێبه‌جێكردنی ڕێككه‌وتنه‌ سیاسی و ئیدارییه‌كانی نێوان هه‌ردوولا كرا، لە نێویشیاندا بابەتی لامەرکەزییەت لە هەرێمی کوردستان. هەردوولا پابەندیی خۆیان دووپات کردەوە بە ڕێکكەوتنی سیاسیی نێوانیان و بەرنامەی کاری کابینەی نۆیەمی حکوومەتی هەرێم بۆ بەرجەستەکردنی لامەرکەزییەت لە هەرێم و شۆڕكردنەوەی دەسەڵاتەكان و لەئەستۆگرتنی بەرپرسیاریه‌تیی ھاوبەش و نەهێشتنی ڕۆتین لە ڕاییکردنی کاری هاووڵاتییان و پێشکەشکردنی پڕۆژە و خزمەتگوزارییە گشتیەکان. لەم ڕووەوە هه‌نگاوه‌كان به‌ ئه‌رێنی هه‌ژمار كران و دووپاتی به‌رده‌وامیی كاری هاوبه‌ش بۆ جێبه‌جێكردنی ته‌واوی ڕێككه‌وتنه‌كان كرایه‌وه‌ و میكانیزمی گونجاو له‌و ڕووه‌وه‌ بڕیاری لێدرا.


له‌ كۆتاییی كۆبوونه‌وه‌كه‌دا، دووپاتی به‌رده‌وامیی كاری هاوبه‌ش و هه‌ماهه‌نگی له‌ناو دامه‌زراوه‌كانی هه‌رێمی كوردستاندا كرایه‌وه‌ كه‌ ئامانج لێی خزمه‌تكردنی هاووڵاتیان و تێپه‌ڕاندنی ئه‌و بارودۆخه‌ سه‌خته‌ی سه‌ر شانی خه‌ڵكی هه‌رێمی كوردستان بێت.
 


PM:07:28:09/11/2020








ئەستێرەکان

Spee Media