واتە تەنها بەشێک لە لایەنی بەرپرسیار روبەروی هێرش و رەخنە بویەوە، بەشەکەی تر خەریکە وەک بەرزەکی بانان و وەک پاڵەوان بۆی دەردەچێ. بێگومان پارتی و بەشەکەی لە حکومەت و پەرلەمان بەرپرسیاری یەکەمی تەواوی ئەو نەهامەتی و قەرزو شکست و گەندەڵیانەن کە روی لەم هەرێمە کردوە، بەڵام لایەنەکانی تریش مادام بەشێکن لە حکومەت، بە پێی قانون، بە قەبارەی خۆیان لەم قۆناغەدا بەرپرس و بەشداری شکت و دۆڕانەکانن. لە راستیدا، پارتی جارێک تاوانبارو بەرپرسیار بێت لە ئاست ئەم هەمو زوڵم و ستەمەی کە لەم قۆناغەدا روی لەم وڵاتە کردووە، ئەوا لایەنەکانی تر دو جار تۆمەتبارو بەرپرسیارن، چونکە لە لایەک لە حکومەتەکەدا شەریکێکی راستەقینەن و، بۆ ئەوەی پۆست و بەرژوەندیەکانیان نەکەوێتە بەردەم مەترسی، ئامادە نین لە ژێر هیچ بیانویەکدا هەڵوێست لە سەر شکستی حکومەتەکەیان ورە بگرن، لە لایەکی ترەوە فێڵ دەکەن و ئەمانیش وەک هەر کەسێکی تر رەخنە لە سیاسەتی نەوت و بێ موچەیی دەگرن و، دەیانەوێ وای پیشان بدەن کە ئەوان هۆکاری کێشەکان نین و تەنها ئاشتی هەورامی و پارتی بەرپرسیارە. کورد وەتەنی ئەگەر پارتی تەنها حەزی لە مێوژ بێت ئەوا لایەنەکانی تر حەزیان لە خورمژە. لە ئاست ئەو هەمو قەیرانەی کە لەم کاتەدا کەڵەکە بووەو، پەرلەمان و حکومەت ئیفلیج کراوە، لایەنەکانی تر کاتێک دەتوانن خۆیان لە ملهۆڕی و سیاسەتەکانی پارتی و ئاشتی هەورامی بێ بەری بکەن و ئەستۆ پاکی خۆیان پیشان بدەن، کە لە روی قانونی و سیاسی و ئەخلاقیەوە هەڵوێستی رۆشن و فعلیان هەبێت. کە ئەمە ناکەن دەبێت بزانن ئەو سیاسەتە ناچێتە سەر، کە لە گەڵ گورگدا گۆشت بخۆن و لە گەڵ مەڕیشدا شین بکەن. کار وا بڕات بە چاوی نەوت و نێچیرفان بەرزانی و ئاشتی هەورامی تەماشای ئێوەش دەکرێت.