تا دێت گومان و ڕەخنەو سکاڵاکان لەسەر ئەنجامی هەڵبژاردنی 12 ئایار چڕترو ئاڵۆزتر دەبن، UN داوای لێکۆڵینەوەی وردو گشتگیرو پەلە دەکات، لەناو کۆمسیۆنی بەغدا مشتومڕ تا ڕادەی شەڕە بۆکس و هەڵکوتانە سەر ئۆفیسی یەکتر رۆشتوە، لەکەرکوک ئاشتی کۆمەڵایەتی کەتۆتە بەر مەترسی و گرژییەکان زۆر لەهەڵبژاردن گەورەتر بوون، 81 پەرلەمانتارو سەلیم جبوری شەممەیان داناوە بۆ گرێدانی دانیشتنێکی کتوپڕ لەبارەی سکاڵاکانی بەرێوەچوونی دەنگدان، لیستە سیاسییەکانیش بەتایبەت ئەوانەی ئەنجامەکەیان بەدڵ نییە لەپێش هەموویانەوە حەیدەر عەبادی درێغی ناکەن لەهەوڵدان بۆ قڵپکردنەوەی دۆخەکەو بەڕوونی ئەمە لەهێرش و هەنگاوەکانی سەرۆک وەزیراندا دژ بەکۆمسیۆن دیارە وەک: هەواڵەکردنی دۆسیەی ئامێرەکان بۆ نەزاهە، ئاشکراکردنی خەمساردیی کۆمسیۆن لەئاست پشکنین و چێککردنەوەی ئامێرەکان، لەگەڵ بەرگری کردنی حکومەت لەسەعید کاکەیی کە درزی گەورەی خستە هەڵوێستی کۆمسیۆنەوە. بەڵام ئایا هەموو ئەمانە دەبنە هۆی سفرکردنەوەی ئەنجامەکان و سپاردنی هەڵبژاردنی داهاتوو بە دەزگایەکی نا حکومی و بیانی "دەزگای کارتەری ئەمەریکی بەنمونە" وەک هەندێک داوای دەکەن؟ ئەمەیان سەرباری مەنتیقی بونەکەی قورس و ئاڵۆزەو سێ ئاستەنگی لەپێشە:
ـ کوێخاو دەمڕاستەکانی عێراق "ماکگۆرک و سلێمانی و سەبهان"، لەناوخۆشدا براوەی یەکەم "سەدر"، وەها رەفتار دەکەن کە ئەنجامە راگەیەنراوەکان واقیع و کۆتایی بن و کەسیان نەیانوتوە با چاوەرێی سکاڵاکان بکەین، ئەوەشی بۆڵەو گلەیی و سکاڵای هەیە زیاتر وا دەردەکەوێت کە بەدوای کورسییەک و دوواندا بگەرێت لێرەو لەوێ، ئەم کێشمەکێشەش زیانی بۆ پرۆسە گەورەکە نییە کە بەرێژەیەکی باش بەدڵی ئەمەریکاو سعودیەو لەهەمان کاتدا ئێرانیشە. جگە لەمەش هەڵوەشاندنەوەی هەر ئەنجامێک و کردنەوەی هەر سندوقێک دەرگای دۆزەخ لەکۆمسیۆن و زۆر لایەنیتر دەکاتەوەو دەبێتە پێشینەیەک کە بۆ ماوەیەکی زۆر ناهێلێت هیچ پرۆسەیەکی دەنگدان ئۆقرە بگرێت، بۆ بەرگرتن لەمەش لایەنە بنەڕەتییەکان لەژێرەوە زیاتر لەگەڵ "عفا الله عما سلف" دان تا جێبەجێکردنی یاسا.
ـ سەبارەت بەپەڕلەمان زۆر قورسە ئەنجومەنێکی کۆتاییهاتوو ببێتە رێگر لەبەردەم دەرکەوتنی ئەنجومەنێکی نوێ کە ئەندامەکانی لەهەمان حیزب و ئاوازی خۆیانن، لەپاش هەڵبژاردن پەرلەمان چیتر هێزو سەنگ و قورسایی یاسایی و دەستوریی جارانی لەدەست داوەو 30 حوزەیران کۆتا رۆژی تەمەنییەتی و هێشتنەوەشی زیاتر بۆ پڕکردنەوەی بۆشاییە، ئەگەر ئەم ئێوارەی هەینی وەک بڕیارە کۆمسیۆن ئەنجامەکان رابگەیەنێت، 329 پەرلەمانتاری نوێ پەیدا دەبن، هەر جووڵەیەکی ئەمانەی ئێستاش لەدژیان زیاتر دەبێتە داخ لەدڵی و هیچ کات وەک جاران بڕشتی نابێت، هەندێکیش بەکوفری دیموکراسی دەزانن تۆ شەڕ بۆ مانەوەی خۆت بکەیت، پەرلەمانێک کە چوار ساڵ هیچی پێ نەکراوە بەرانبەر کۆمسیۆن چۆن لەم کۆتاییەدا دەتوانێت؟!.
ـ لەمێژووی پرۆسەی سیاسی عێراقدا "2003"، هیچ شتێک بەیاساو رێککارە بنەڕەتییەکان یەکلایی نەکراوەتەوە، هەمیشە تەوافوقات و پرەنسیپی "بۆم بپۆشە بۆت دەپۆشم" و "بەشی من و بەشی تۆ" و رێککەوتنی خولەکەکانی کۆتایی بڕیاردەرو سەروەر بووە، تەنانەت سەعید کاکەیی کە قەراربوو بن بەڕە بخاتە سەر بەڕە بەچەند ئاخ هەڵکێشانێک ناڕاستەوخۆ پەیامەکانی گەیاند لەکاتێکدا ماڵی لەکەنەدایە، ئەمەش ئاماژەیەکی ڕوونە لەسەر هێزو کاریگەری پشت پەردە "کوالیس" لەسەر ئەو هەراو زەنایەی ئێستا ئەگوزەرێت، بێگومان هەر ئەو پشت پەردەیەش ئەنجامی هەڵبژاردن یەکلایی دەکاتەوە نەک بەیاننامەو شیکارە یاسایی و مەنتیقییەکان کە هیچ لەبەرژەوەندی هەڵبژاردنەکەدا نین و ئەگەر پشتیان پێ ببەسرێت نەک سفری دەکەنەوە بەڵکە وەک پەڵەیەکی رەش لەمێژووی نوێی عێراقدا ئەیهێڵنەوە چونکە چ لەهەندەران و چ لەناوخۆی عێراق چەندین فەرسەخ لە پاکوبێگەردییەوە دوور بووە.
سبەی شەممە زۆر شت یەکلایی دەبێتەوەو دەردەکەوێت رێککار سەردەکەوێت یان رێککەوتن، ئەو هەواڵەشی ئەمڕۆ بەپارە دەستت ناکەوێت سبەی بەبەلاش کەس نایەوێت.