کاتێک حزبایەتی و سیاسەت کردن لەهەرێمی کوردستان ئاڕاستەکەی گۆڕا، لەدروشمە نەتەوەیی و پرەنسیبەکانی خۆی لایدا، ئینتیمای سیاسی حزبەکان بەجۆرێک لاوازبوو، کەڕۆژ بەڕۆژ لێکەوتەکانی بەدی دەکرا .
لەناکاو کۆمەڵێ کۆمپانیای زەبەلاح، لەژێر ناوی وەهمی و کۆمەڵێ دەوڵەمەندی هەڵتۆقیوی نەناسراو بەلێشاو لەهەرێمی کوردستاندا دروست بوون.
ئەم ئاڕاستە گۆڕینە لێرەوە دەستی پێکرد، کاتێک بازرگانی لەژێر رووپۆشی سیاسەتدا دەستیپێکرد ، کەسیاسیە دەسەڵاتدارەکانی هەرێم بەو ناوەوە، تا ئێستا حکومڕانی پێ دەکەن. دواتر دەرئەنجامەکەی ئەم دۆخەی ئێستای لێکەوتەوە، برسی کردنی میللەتێک و، دەوڵەمەند کردنی سیاسیە بازرگانەکان، لەم نێوەندەشدا لەبیرکردنی ئەرکە نەتەوەیی و نیشتمانیەکان.
بازرگانی سیاسی و کۆمپانیایی حزبی بەتەنیا هۆکار نین بۆ زۆرو زەوەندی قەیرانە ئابووری و سیاسی و کۆمەڵایەتیەکان، چونکە لەپشت ئەمانەوە و ، لەهەمان کاتدا پیربوونی عەقڵی سیاسی بڕیاربەدەستەکانی حزب، کە هەم شەریکن و هەم بڕیاربەدەستن، هۆکاری درێژە پێدانی بارودۆخەکەن.
عەقڵیەتی سیاسیە بەسەرچووەکان، لەنێو سیستمی سیاسی ئێستادا، بارگرانییە بەسەر شانی میللەتەوە، چونکە ئەوان هێشتا بە رۆحیەتی ململانی توند و خۆسەپێنیی، سەوداو مامەڵەی سیاسی دەکەن، لەو ڕوانگەیەوە خۆیان دەبینن کەدەبێت بۆ ئەبەد حاکم بن و بەقووتی میللەت تەختی شاهانەیان چوار ساڵ جارێک بەئاڵتوون نوێ بکرێتەوە.
سیاسیە بازرگانەکان و عەقڵەیەتی سیاسی کۆن، نەحساب بۆ پرەنسیپ و پەیرەو پرۆگرامی حزب دەکەن و نە بۆ کارنامەکانیان، نە بۆ یاسا و دەزگای تەشریعی، نەبۆ هاووڵاتی و نە داهاتووی وڵاتەکەیان، تەنانەت نە بۆ مێژوو و نە بۆ خەباتیان، ئەوەی دەیبینن سوڵتەو کۆمپانیاکانیانە، کە چۆن بمێننەوە و بەرژەوەندیاکانیان چۆن بپارێزن! بێگومان هەموو ئەمانە بەتەنها بەخۆیان ناکرێت، بەڵکو بەهاوکاری کۆمەڵێ دەهۆڵ کوتی دەسەڵاتەکەیانە.
بەکورتی و کوردی، چارەسەر نە بەپرۆژە هەزار بارەکان و نە بەچاکسازییەکانی ناویان لێناوە پاشەکەوت دەکرێت، بەڵکو هەنگاوی بوێرانەتر پێویستە، ئەگەر کەسان و لایەنێک مابن، ئیرادە و ئینتیمایان بۆ هاووڵاتی و هەرێم مابێ. ئەوا پێویستە دەنگ هەڵبڕن و بڵێن، بۆ تێپەڕاندنی ئەم قۆناغە سەختانە، پێویستە ئەو دوو فیئەیە دانیشن واز لەکۆی سیستەمی سیاسی و حکومڕانی وڵات بێنن، یان دووربخرێنەوە، ئەوانیش:-
1- عەقڵیەتی سیاسی کۆن.
2-بازرگانە سیاسیەکان.