سیاسیەکانی کورد و دەسەڵاتدارانی هەرێم حاڵی حازر، ئەم پەندە کوردییە دەیان گرێتەوە، کەدەڵێت (بانێکە و دوو هەوا). لێرە هەموو پرۆسەی سیاسیان پەکخستووە و میللەتیان دەستخەڕۆی دەوڵەت کردوە ، لەبەغداش بەپاڵ ناڕۆن.
لەماوەی رابردوو کورد، کەبەشداری لەپرۆسەی سیاسی لەعیراقدا کردوە، ئەبێت دەستکەوتی بۆ میللەت چی بوو بێت؟
جگە لە پڕبوونی هەرێم لەئاوارەی عەرەب و ، پڕبوونی گیرفانی هەندێ وەزیرو گزیر. ئەوە حاڵی خەڵک و دامەزراوەکانی هەرێمە، کە لەپای بڕینی بودجە وەکو ئەیانوت کە بەغدا موفلیسە، خەڵکیان برسی کرد و هەرێمیان بەم دۆخە گەیاند . لەلایەکی تریشەوە شەڕی تیرۆریان بەپێشمەرگەو رۆڵەی فەقیرو هەژارکرد.
ئێمەی کورد هەمیشە بەهۆی هەڵەی سیاسی تووشی نەهامەتی و شکستی سیاسی بووین و دەرفەتی زۆرمان لەدەستداوە، هەڵەی سیاسیش تەنها هۆکاری شکستی سیاسی نەبووە، بەڵکو ململانێ و خۆخۆری لەسەر پۆست و دەسەڵات و دەست بەسەراگرتنی قووتی خەڵکیش هۆکارێکیتری ئاڵۆزی و شکستی سیاسییە لەهەرێمی کوردستان.
لەئێستادا شەڕ شەڕی شیعەو سونەیە و سیاسیەکانی کوردیان کردوە بەسوری بەرلەشکر و ئەیانەوێت هەروەک پێشوو بە دەنگی کورد کێشەکانیان یەکلابکەنەوە، دواتریش هەر دانیشتن لەسەرکورسی ئەوان (ئیخوەکەی) جارانن و دەستبەرداری ململانێی تایفی دەبن و لەچوارچێوەی عێراقێکی یەکگرتوودا، تاڵاو دەکەنەوە بەقورگی خەڵکی کوردستان و وەلایان بۆ شیمالی حبیب هەرئەوەنەیە.
گەر سیاسیەکانی کورد مانەوەیان دەوێت لەبەغدا ئەوا با خۆیان بەدوور بگرن لەو شەڕوشۆرەی عەرەب و ئێوە مەبنە بەشێک لەململانێکانییان باخۆیان چارەسەری کێشەکانیان بکەن.
لەحاڵەتێکی تریش ئەگەر بەنیازی دەوڵەتن، ئەوا جانتا دیبلۆماسیەکانتان بگرن بەدەستەوەو وەرنەوە چاکسازی لەم هەرێمە پڕقەیرانەدا بکەن و شەرعیەت بۆ پەرلەمان بگێڕنەوە و وەزیرەکان بخەنەوە سەرکارو شەڕە دەبە بکەن لەناو پەرلەمانی کورستاندا، تا دەستاودەستی دەسەڵات دەکرێت و یاسا سەروەردەبێت.
تا ئەم میللەتەی کە هەموو لایەکتان بەکاری دێنن بۆ ئامانج و دەستکەوتی سیاسی و حزبی خۆتان کەمێک بحەسێتەوە لەسیایەی دڵسۆزیتان.
لەلایەکیتریش تێمان بگەینن، بۆ لەبەغدا بەپاڵ ناڕۆن، لێرەش بەمژدەی راگەیاندنی دەوڵەت دەسخەڕۆمان ئەکەن .