پەیامی )د.قەرەداغیی( لەسەر ڕیفراندۆم

ڕۆژی چوارشەممە (٢٧/٩/٢٠١٧)، پەیجی (د.عەلی قەرەداغیی)، لەتۆڕی کۆمەڵایەتیی فەیسبووک، بەزمانی کوردیی پەیامێکی جەنابی دکتۆری؛ لەسەر پرۆسەی ئەنجامدانی ڕیفراندۆمی هەرێمی کوردستان بڵاوکردەوە، کە ئاراستەی گەلی کوردستانی کردبوو.

قەرەداغیی لەو پەیامەدا بەناوی خۆیەوە، وەکو سەرۆکی ڕێکخراوی (ڕابیتەی ئیسلامی کورد)، پەیامەکەی نووسیووە، ناوەرۆکی پەیامەکە، بەزمانێکی هێمن و نەرم نووسراوە، لەگەڵ ئەوەی لەهەندێک بڕگەی پەیامەکەدا؛ میانگیریی پەیڕەو کردووە، لەهەمان کاتیشدا دژی پرۆسەی ڕیفراندۆم نەوەستاوەتەوە، بەڵکو بەوردیی و بابەتیی بەرگریشی لێ ئەکات و بەپێنج خاڵیش پشتیوانیی لێ ئەکات، تا ئێرە مایەی دەستخۆشییە، بەڵام !

ئەشێ پەیامەکە؛ هەر بەکوردیی بێت؟

ئەبوایە (د.قەرەداغیی)؛ وەکو ئەمینداری گشتیی ڕێکخراوی(یەکێتیی جیهانیی زانایانی موسوڵمانان)؛ هەمان پەیامی بەزمانی عەرەبیی، یان پەیامێکی تری جیاوازی بەزمانی عەرەبیی؛ بۆ پشتگیریی و بەرگریی لەپرۆسەی ڕیفراندۆمی هەرێمی کوردستان بڵاوبکردایەتەوە، بەتایبەتی کە بەرێزی وەکو کەسایەتییەکی ئەکادیمیی و فەقیهێکی گەورە وموفتیی و زانایەکی ئیسلامیی ناوداری بواری شەریعەت و پسپۆڕێکی ئابووری ئیسلامیی ناسراو لەجیهانی ئیسلامییدا، لە چەندین کۆنگرەو کۆڕبەندو ڕێکخراوو زانکۆو ناوەندی ئایینیی و ئەکادیمیی دا؛ بەشداریی وڕۆڵ وپلەو پایەو پۆستی کارگێڕیی و ئەکادیمیی و زانستیی و ئایینیی گرنگ و باڵای هەیە، بەهۆیەوە بووەتە خاوەنی تۆڕێکی پەیوەندیی بەرفراوان، لەجیهان و لەجیهانی ئیسلامییدا.

ئەم کێشەیەی نێوان هەرێمی کوردستان و دەوڵەتی عێراق، لەسەر ئەنجامدانی پرۆسەی ڕیفراندۆم؛ یەکێکە لەو کێشە گەرم و ورووژاوانەی ئەمڕۆی جیهان و جیهانی ئیسلامیی، ڕێکخراوی (یەکێتیی جیهانیی زانایانی موسوڵمانان)یش؛ کە (د.قەرەداغیی) ئەمینداری گشتییەتی، بەردەوام پەیام و بەیاننامەو فەتواو لێدوان و ڕوونکردنەوەی بۆ دەربڕینی هەڵوێست؛ لەسەر ناکۆکیی و قەیران و تەنگژەو ململانێ و کێشەکانی جیهانی ئیسلامیی هەیەو بەهۆیەوە دیدو بۆچوون و تێگەیشتن و جیهانبینیی خۆی؛ لەسەر هەر یەکێک لەو کێشانە، بەئاشکراو بێ تەمومژ ئەخاتەتەڕوو، لەنموونەی ناکۆکیی و ململانێی دەوڵەتی قەتەر، لەگەڵ هەر چوار دەوڵەتی سعوودیەو ئیمارات و بەحرەین و میسر، کە لەسەرەتای مانگی تەمووزی ڕابردووەوە سەریهەڵداوەو بەردەوامە، تیایدا هەڵوێستی ئەم ڕێکخراوەو خودی (د.قەرەداغیی)؛ بەئاشکراو بەڕوونیی بەلای دەوڵەتی قەتەردا شکاوەتەوە، یان لەکاتی کودێتاکەی ڕۆژی (١٥/٧/٢٠١٦)ی توورکیادا، وەک دەرکەوت، هەڵوێستی ئەم ڕێکخراوە؛ بەزەقیی بەلای (ئەردۆگان)ی سەرۆک کۆمارو سەرۆکی (پارتی دادو گەشەپێدان)ی توورکیادا شکایەوەو ڕۆژی دوای شکستی کودێتاش؛ شاندێکی ئەو ڕێکخراوە، بەسەرکردایەتیی (د.قەرەداغیی) بۆ پشتیوانیی لە(ئەردۆگان)، زوو گەیشتنە لای (ئەردۆگان)و لەگەڵیدا بەشدارییان کرد لەناشتنی جەنازەی هەندێ لەئەفسەرو سەربازە کووژراوەکانی سوپای توورکیا؛ کەڕۆژی پێشووتر لەلایەن کودێتاچییەکان کووژرابوون، دیسان لە گەڕی یەکەم و دووەمی دوا هەڵبژاردنی پەرلەمانی توورکیای ساڵی (٢٠١٥) و لەپرۆسەی ڕاپرسیی توورکیای ڕۆژی (١٦/٤/٢٠١٧)ش، بۆ دەستکارییکردنی دەستووری توورکیا، بەهەمان شێوە، ئەم ڕێکخراوەو خودی (د.قەرەداغیی)؛ ئاستی داشکانەوەیان بەلای (ئەردۆگان)دا؛ گەیشتبووە ئەوەی خودی دکتۆر بەنزاو بەدووعا؛ بەجریوەی توەیتەر؛ لەخوا ئەپاڕایەوە کەپارتەکەی (ئەردۆگان) سەربخات، هەروەها لەساڵی (٢٠١٦)شدا؛ کەدەوڵەتی توورکیا؛ نیگەرانیی و مەترسیی هەبوو، لەسەر کەمبوونەوەی هاتنی گەشتیاری بیانیی بۆ توورکیا، خودی (د.قەرەداغیی) داوای لەهەموو موسوڵمانانی جیهان کرد؛ بۆ سەردان و گەشتەکانیان؛ ڕوو لەوڵاتی توورکیا بکەن، هەروەها نموونەیەکی تریش بریتییە لەململانێی نێوان ئیخوان موسلمینەکانی میسرو حکومەتی (سیسیی)،شایەنی باسە لەو ململانێیەدا ئەم ڕێکخراوەو جەنابی (د.قەرەداغیی)یش؛ بەهەڵوێستە دژو تووندەکانیان؛کەوتوونەتە سەنگەری ئیخوان موسلمینەوە لەدژی (سیسیی)، شایەنی باسە چەندین نموونەی تر لەئارایە، لەسەر هەڵوێستەکانی دکتۆرو ئەو ڕێکخراوە، بۆ کێشەو ناکۆکیی و قەیران و ململانێکانی ناو جیهانی ئیسلامیی.

هاوخوێنەکانی (د.قەرەداغیی)یش موسوڵمانن!

خستنەڕووی ئەم نموونانە بۆ ئەو مەبەستە بوو؛ تاکو لەمسۆنگەیەوە بپرسین؛ ئایە لەئێستادا هاوزمان و هاونەتەوەو هاوخوێنەکانی (د.قەرەداغیی)، ئەوانیش بەشێک نین لەکۆمەڵگەی موسوڵمانان؟، بۆچی بۆیان نەبێت؛ ڕەخنەو گازاندە ئاراستەی ڕێکخراوی (یەکێتیی جیهانیی زانایانی موسوڵمانان) بکەن، ئەمە لە کاتێکدا ژمارەیەک ئەندامی کورد؛ لەمەلاو کەسایەتیی ئیسلامیی سیاسیی، لە ڕیزەکانییدا هەیەو (د.قەرەداغیی)یش؛ ئەمینداری گشتیی ئێستایەتی، ڕەخنەو گازاندەکە لەسەر ئەو بنەمایەی؛ کە ئەوان هیچ جۆرە هەڵوێستێکی پشتیوانیی و بەرگریی و هاوسۆزیی و داشکانەوەیان بەلای ڕیفراندۆمی هەرێمی کوردستاندا نییە، لەکاتێکدا ئەمڕۆ ئەم کێشەیە بووەتە، تەنگژەو کێشەیەکی گەورە لەنێوان هەرێمی کوردستان و دەوڵەتی عێراق!

پاش بڵاوبوونەوەی پەیامەکەی (د.قەرەداغیی)، لەسەر پرۆسەی ڕیفراندۆمی کوردستان، (بەندە) بۆ بەدواداچوون و سۆراخ؛ بەوردیی گەشتێکی چڕم کرد بۆ پشکنین و گەڕان؛ بەئەکاونتە عەرەبییەکانی سۆشیال میدیاو چەناڵی یوتیوب و ماڵپەڕ و ئەپی (د.قەرەداغیی) و (یەکێتیی جیهانیی زانایانی موسوڵمانان)، تاکو سۆراخی هەڵوێستی ئەو ڕێکخراوەو ئەمیندارە گشتییەکەی(د.عەلی قەرەداغیی) بکەم؛ چ لەسەر ڕیفراندۆمی کوردستان، چ لەسەر ئەو ناکۆکیی و ململانێیانەی کە بەهۆی ئەنجامدانی ڕیفراندۆمەوە؛ لەنێوان هەرێمی کوردستان وعێراقدا دروستبووەو تەشەنەی سەندووە، بەڵام ئەفسووس لەهیچ یەکێکیاندا، نە هەواڵ، نە وتار، نە فەتوا، نە پەیام، نە ڕوونکردنەوە، نە لێدوان؛هیچم لەسەر ڕیفراندۆم و هەڵوێست لەسەر ڕیفراندۆم چنگ نەکەوت، ئەمە لەکاتێکدا؛ ئەو پەیج و ئەپ و ئەکاونت و چەناڵی یوتیوب و ماڵپەڕانە؛ سیخناخ بوون بەچەندین بڵاوکراوەو بابەت و پۆست؛ لەسەر کێشەو ململانێی جۆراوجۆری کۆمەڵگە موسوڵمانەکانی تر،ئەمە لەکاتێکدا ئەگەر تەنگژەی پرۆسەی ڕیفراندۆمی کوردستان، لەو کێشەو ململانێیانە؛ گەورەترو ورووژاووترو کاریگەرتر نەبێت؛ ئەوا کەمتر نییە!.

شایەنی باسە جەنابی (د.قەرەداغیی)، بێجگە لەپەیجێکی فەیسبووک بەزمانی کوردیی، خاوەنی چەندین ماڵپەڕ و ئەپ و چەناڵی یوتیوب و پەیجی فەیسبووک بەعەرەبیی و ئەکاونتی توەیتەرە، بەهەمان شێوە (یەکێتیی جیهانیی زانایانی موسوڵمانان)یش، خاوەنی چەندین ماڵپەڕو پەیجی فەیسبووک و توەیتەرو چەناڵی یوتیوبی تایبەت بەخۆیانن، خوێنەران بۆ دڵنیایی و بەدواداچوون و گەیشتن بەڕاستیی زیاتر، لەبارەی ئەوەی کە من ئاماژەم پێکردووە؛ لەسەر دیدو تێڕوانین و هەڵوێستی ئەوان، سەبارەت بەڕیفراندۆم و کێشەی ڕیفراندۆم، لەگەڵ دەوڵەتی عێراق؛ ئەتوانن سەردانی ماڵپەڕ و ئەپ و چەناڵی یوتیوب و پەیجی عەرەبیی فەیسبووک و توەیتەری(د.قەرەداغیی)و ڕێکخراوی (یەکێتیی جیهانیی زانایانی موسوڵمانان) بکەن، کەبریتین لەمانەی خوارەوە :

یەکەم/ ماڵپەڕو ئەکاونتەکانی دکتۆر عەلی قەرەداغیی :

١- ماڵپەڕی (د.قەرەداغیی) بەناوونیشانی (www.qaradaghi.com).

٢- ئەپی (د.قەرەداغیی) لەسەر مۆبایل و ئایپادی سیستەمی ئایۆس و

ئەندرۆیید، بەناوونیشانی (أ.د القرده داغي).

٣- چەناڵی (د.قەرەداغیی) لەیوتیوب، بەناوونیشانی (‌‌‌‌‌أ.د: علي القره داغي).

٤- ئەکاونتی (د.قەرەداغیی) لەتوەیتەر، بەناوونیشانی (@aliqaradaghi).

٥- پەیجێکی تری (د.قەرەداغیی) لەفەیسبووک بەزمانی عەرەبیی، بەناوونیشانی

(alqaradghi).

دووەم/ ماڵپەڕو ئەکاونتەکانی (یەکێتیی جیهانیی زانایانی

موسوڵمانان) :

١- ماڵپەڕی ڕێکخراو بەناوونیشانی (http://iumsonline.org/ar/)

٢- چەناڵی یوتیوبی ڕێکخراو بەناوونیشانی (iumsonline itihad).

٣- پەیجی ڕێکخراو لەفەیسبووک بەناوونیشانی (iumsonline).

٤- ئەکاونتی ڕێکخراو لەتوەیتەر بەناوونیشانی (iumsonline).

پێشنیار بۆ (د.قەرەداغیی)

١- ئێستاش نەچووە بچێ و دەرفەت ماوە؛ ئەگەر جەنابی (د.قەرەداغیی) دەقی پەیامە کوردییەکەی لەسەر ڕیفراندۆم؛ وەرگێڕێت بۆ سەر زمانی عەرەبیی و لەو شوێنانەدا بڵاوی بکاتەوە، کەتیایدا بەردەوام لەسەر کێشەو تەنگژەو ململانێکانی تری ناو جیهانی ئیسلامیی؛ وتارو بابەتی بەزمانی عەرەبیی تیا بڵاوکردۆتەوە، یان وەکو ئەمینداری گشتیی ڕێکخراوی (یەکێتیی جیهانیی زانایانی موسوڵمانان) ؛ پەیام، یان بەیانێکی پشتگیریی، وەکو پەیامە کوردییەکەی لەسەر ڕیفراندۆم، بۆ جیهانی ئیسلامیی بڵاوبکاتەوە؛ پێشبینی ئەکرێت کاریگەریی هەبێت، هەر چەندە تووشی هێرش و ڕووبەڕووبوونەوەو فشارو ڕەخنەی بەشێک؛ لەهێزو پارت و کەسایەتییەکانی ڕەوتی ئیسلامی سیاسیی و ناسیونالیستیی دەمارگیری عەرەبیش ئەبێتەوە.

٢- جەنابی (د.قەرەداغیی)؛ هەوڵ و کۆششەکانی لەجیهانی ئیسلامییدا بخاتەگەڕ؛ بۆ خزمەتی دۆزی ڕیفراندۆم و ئەنجامەکانی، لەمڕووەوە ئەو ئەتوانێت سوود لەئاستی بەرزو گەشەسەندووی پەیوەندییەکانی لەگەڵ (پارتی دادو گەشەپێدان) ی توورکیای فەرمانڕەواو خودی (ئەردۆگان)ی سەرۆکی پارتەکەو سەرۆکی دەوڵەتی توورکیا وەربگرێت، بۆ خاووکردنەوەی گووشارەکان و نەهێشتنی هەڕەشەکانی دەوڵەتی توورکیا، لەسەر هەرێمی کوردستان بەهۆی ڕیفراندۆم، چونکە ئاستی بەرزی پەیوەندییەکانی لەگەڵ خودی (ئەردۆگان)؛ گەیشتۆتە ئاستێک؛ جەنابی قەرەداغیی کەی بیەوێت، بەردەوام قاپیی کۆشکی کۆماریی توورکیای بۆ خراوەتە سەرپشت؛ بۆ دیدەنی مەقامی سووڵتان (ئەردۆگان)!.

مەسەلەیەکی وا گرنگ و هێندە چارەنووسسازی وەکو ڕیفراندۆم ودەرهاویشتەو دەرئەنجامەکانی ڕیفراندۆم، یان ئەو هەڕەشەو مەترسیی و فشارو گووشارانەی کەڕووبەڕووی هەرێمی کوردستان بۆتەوە، هەروەها دوای ئەوەی ناوەندە فەرمیی و نێودەوڵەتییەکان و وڵاتان و دەوڵەتی عێراق و ناوەندە ئایینیی و هێزە سیاسییەکانی عێراق و ...هتد، قسەیان لەسەر کردو هەڵوێستی خۆیان لەسەر ڕاگەیاند؛ ڕەوایە (د.قەرەداغیی)، تەنها پەیامێکی بڵاوکراوە بەزمانی کوردیی؛ لە تەنها پەیجە کوردییەکەیداو بەناوی سەرۆکی ڕێکخراوی (ڕابیتەی ئیسلامیی کورد)ەوە؛ بەپێویست بزانێت و ئیکتیفای پێوە بکات؟، ئەگەر هەر ئەوە بێت ، ئەوا پرسیاری ترو ڕەخنە و لێکدانەوەی تر؛ بەدوای خۆیدا دروست ئەکات!.

ئیخوان موسلمین و پرۆسەی ڕیفراندۆم

ڕێکخراوی نێودەوڵەتیی ئیخوان موسلمین؛ یەکێکە لەئۆرگانە نێودەوڵەتیی و گەورەکانی ئیسلامی سیاسیی لەجیهان، ئەو ڕێکخراوە نێودەوڵەتییە بووەتە ناوەندێک بۆ کۆکردنەوەو سەرپەرشتییکردنی؛ دەیان پارت و ڕێكخراوو ئۆرگان و ناوەندو دامودەزگای ئیخوان موسلمین لەجیهان بەگشتیی و جیهانی ئیسلامیی بەتایبەتیی، هەرچەندە ئێستا ئەم ڕێکخراوە نێودەوڵەتییە لەقەیران و تەنگژەدایە ، بەڵام بەردەوامەو لەکار نەکەوتووە، یەکێک لەکارەکانی ئەم ڕێکخراوە نێو دەوڵەتییە بریتییە لەهەڵوێست دەربڕین و دروستکردنی کاریگەریی لەسەر کێشە و قەیران و ململانێکانی ناو جیهانی ئیسلامیی.

جەنابی (د.قەرەداغیی)؛ بەیەکێک لەکەسایەتیی و ڕەمزە کاریگەرەکانی ئیخوان موسلمین لەقەڵەم ئەدرێت، ڕێکخراوی (یەکێتیی جیهانیی زانایانی موسوڵمانان) یش؛ بەڕێکخراوێکی نزیک وهەماهەنگ و لایەنگرو دۆست لەگەڵ ڕێکخراوی نێودەوڵەتیی ئیخوان موسلمین ئەژمار ئەکرێت، لەم ڕوانگەیەوە؛ ئەم پرسیارانە ئاراستەی (د.قەرەداغیی) ئەکەم :

١- (د.قەرەداغیی) وەکو کەسایەتیی؛ لەڕووی سیاسیی و فیقهیی و فیکرییەوە، لەسەر ڕێکخراوی (نێودەوڵەتیی ئیخوان موسلمین) و (یەکگرتووی ئیسلامیی کوردستان) ئەژمار ئەکرێت، (یەکگرتووی ئیسلامیی کوردستان )؛ یەکێک بوو لەهێزە سەرەکییە بەشدارەبووەکانی ناو پرۆسەی ڕیفراندۆمی کوردستان، ئایە جەنابی دکتۆر؛ ڕۆڵ وکاریگەریی هەبووە لەپشتیوانییکردن و هاندانی ئەو پارتە لەبڕیاری بەشدارییکردن لەناو پرۆسەی ڕیفراندۆم؟، ئاماژەکان وادەریئەخەن کە هەیبووبێت، بەتایبەتیی کە(یەکگرتووی ئیسلامیی)؛ بەردەوام لەبڕیارو هەنگاوو هەڵوێستەکانیدا؛ پرس و ڕاوێژی پێویستی پێ ئەکات، پرسیار لێرەدا ئەوەیە کە بۆچی (د.قەرەداغیی)، ئەو پشتیوانیی و لایەنگرییە فراوانتر ناکات، بۆ ناو پارت و ڕێکخراوەکانی تری ئیخوان موسلمین لەجیهان و ناوچەکەو لای ئەو وڵاتانەی کە لەپەیوەندیی بەهێزدان لەگەڵ ئیخوان موسلمین؟

٢- ئاراستەیەک لەناو ئایینزای شیعەو ئاراستەیەکیش لەناو ئایینزای سوونەی عەرەب لەعێراق؛ ڕەهەندو هۆکاری ناکۆکیی و ململانێی ڕیفراندۆمیان لە ململانێیەکی نەتەوەییەوە؛ گۆڕیوە بۆ ململانێیەکی ئایینیی و گەیاندوویانەتە ئەوەی کە بەبەیاننامەی ئایینیی توندو فەتوادەرکردن؛ بانگەواز بۆ بەرپاکردنی جیهاد، لەدژی هەرێمی کوردستان بکەن، ئایە ئەمە نابێتە پاڵنەرێکی گرنگ؛ بۆ هەڵوێست وەرگرتنی ئێوە لەڕێکخراوی (یەکێتیی جیهانیی زانایانی موسوڵمانان) و (ڕێکخراوی نێودەوڵەتیی ئیخوان موسلمین)؟.

٣- (د.سەلیم ئەلجبووریی) سەرۆکی پەرلەمانی عێراق، کە لەهەمانکاتدا جێگری ئەمینداری گشتیی لقی عێراقی ڕێکخراوی ئیخوان موسلمینە(پارتی ئیسلامی عێراق)؛ خۆی و فراکسیۆنەکەی لەپەرلەمانی عێراق، پێش ئەنجامدانی پرۆسەی ڕیفراندۆم و دوای پرۆسەکە؛ ڕۆڵ و جموجۆڵ و بەشدارییەکی کاراو گەورەیان؛ هەبووەو هەیە بۆ دژایەتیی و ڕەتکردنەوەی ڕیفراندۆم و ئامادەکردنی پاکێجێک لەبڕیاری پەرلەمانیی؛ لەدژی هەرێمی کوردستان، لەناو بڕیارەکاندا؛ بڕیاری داواکردن لە(عەبادیی)ی فەرماندەی گشتیی هێزە چەکدارەکانی عێراق، بۆ بەکارهێنانی هێز، لەدژی گەلی کوردو هەرێمی کوردستان، ئایە هەڵوێستی ئێوەی ئیخوان موسلمین و (یەکێتیی جیهانیی زانایانی موسوڵمانان)؛ لەسەر ئەم ڕۆڵەی سەرۆکی پەرلەمان و فراکسیۆنەکەیان لەپەرلەمانی عێراقدا چییە؟!، ئایە ئەگەر ئەو جەنگە لەدژی کورد بەرپا بێت، لەکوێدا ڕائەوەستێت و چ ئاکامێکی ئەبێت ؟، چەند خوێنی تیا ئەڕژێت و چ شوێنەواریکی خراپ؛ لەسەر ڕەوشی سیاسیی و ئاسایش و ئابووریی عێراق و کوردستان بەجێ ئەهێڵێت؟؛ عێراق و کوردستان؛ ئەگەڕێنێتەوە بۆ چ دۆخێکی کوشتارو وێرانەو کارەساتی گەورەی تراژیدیی و دووبارەبوونەوەی تاوانەکانی جینۆسایدو ...هتد؟!.

ئایە ئەم هەڵوێستەی سەرۆکی پەرلەمان و فراکسیۆنەکە ئیخوان موسلمینەکە؛ زادەو هەڵقووڵاوو هەڵهێنجراوی دەقەکانی ئایینی ئیسلام و پەیام و تەعالیمەکانی (حەسەن بەننا)ی دامەزرێنەری ئیخوان موسلمینە؟، یاخود دەرهاویشتەی دەمارگیریی و توندڕەویی عەرەبچێتییە؟، ئەگەر ئەو هەڵوێستانە؛ هەڵهێنجراوو بەرجەستەی دەقی ئایینیی و ئەدەبیاتی ئیخوان موسلمین نییە، ئەوا پێویستە لەئاستی فەرمیی (ڕێکخراوی نێودەوڵەتیی ئیخوان موسلمین) و ڕێکخراوی (یەکێتیی جیهانیی زانایانی موسوڵمانان)دا؛ بەرەنگاریی ببنەوەو هەڵوێستی لەسەر وەربگرن؟!