با لە مێژووی دوور لێگەرێین ، لە شۆرش و قوربانیەكانی هەرە نزیك  ، تێرامێنین . لەم بەشەی باشوری كوردستاندا ، ماوەیەك ، لە ژێر ناونیشانی ، جەلالی و مەلاییدا ، خوێنی هەزاران ، هەژار ، رژایە ناو مێژوویەكی بەتاڵەوە . لە حەفتاكانی سەدەی رابردوودا ، شۆرشێك ، هەڵایسان و هەرەسی ، پایەی بڕیای كەسێك و بنەمالەیەكی دیاریكراوبوو . لەدوای هەرەس ، شۆرشێك پر لە قوربانی ، هەڵایساو  ، بەكارەساتی هەلەبجەو ئەنفالێكی نەتەوە كوژ ، كۆتایی هات .  لە نەوەدەكانی سەدەی رابردوشدا ، راپەرین ، لە بری ، لەخەم رەخسانی هەژاران ،جوت خێزانی حیزب و خزم ، شەری ناو خۆیان بۆ ئێمە بەدیاری هێناو ، روبارێكی تر لە خوێنی لاوەكانمان ، راپەرینی خوێناوی كرد .ئەمیان ئێرانی دەهێناو ئەویان 31ی ئابی تۆماركرد ، ئەمیان لەگەل بەغدا ئاشت دەبوەوە ، ئەمیان توركیای بۆ كەپكی حەمەداغا هێنا . ئەو رۆژەی كە بریاری ئەنجومەنی ئاسایشی نێودەولەتی ناسراو بە ( نەوت بەرامبەر بەخۆراك) جێبەجێكرا ، نوخبە حوكمرانەكانی ئێمە ، لە كۆمپانیا ی حیزب و خزمدا كورتبونەوە ، پارەی ئەو بریارە ، نیوەی چوە نا و باخەڵ و بانكە دروستكراوەكانی حیزبەوە .كۆشك و تەلاری دەستەی جوت خێزانی حیزب و خزم ، بەرەو ئاسمان باڵایان كرد . كە دەسەڵاتی بەعسیش هەڵوەشا ، حیزب و خزم ، تاوانی شەری ناو خۆیان  لە ملی ئێمە هاڵاندو ، پەرلەمان و حكومەت و پشكەبەشەكانی كوردیان ، لەبەغدا ،  وەك غەنیمە لە نێوان خۆیاندا ، دابەشكرد . دیگەلەش هەر بەسنوری نێوانمان مایەوە .