میهر نایف یەکێک لە خوێندکارە یەکەمەکانى ساڵی پار لە خۆپیشاندانەکانى خوێندکاراندا لە سلێمانى دەستگیرکراوە و دایکى ئەو خوێندکارە دەڵێت "چارەنوسى نادیارە".

دایکى میهر لە هەژمارى خۆى لەتۆڕی کۆمەڵایەتی  فەیسبوک باسى لەوەکردووە، کوڕەکەى کە ئێستا قوتابی کۆلێژی پزیشکیە لەبرى ئەوەی خەڵات بکرێت،  دەستگیرکراوە و لە ئێستادا زیندانی کراوە. 

باسی لەوەشکرد، کوڕەکەی داوای مافی خۆی و هاوڕێکانی کردووە بە شێوازێکی مەدەنیانە، دەشڵێت " لەسەر شەقامی گشتی  فڕێندراوە و بێ سەرو شوێنیان کردووە بێ ئەوەی تا ئێستا هیچ سۆراغێکی هەبێت".

ڕێکخراوی گەشەپێدانی قوتابیان لقی سلێمانی سەر بە یەکگرتوو لە راگەیەنراوێکدا  ڕایگەیاند "میهر نایف قوتابی کۆلیژی پـزیشکی سلێمانی و ئەندامی ڕێکخراوی گەشەپێدانە بەڕێکاری مەدەنی و بە مەبەستی داخوازی مافە زەوتکراوەکانیان لەگەڵ ژمارەیەکی دیکەی قوتابی بەشداری خۆپیشاندانی هێمنانەیان کردووە، بەڵام لەلایەن هێزە ئەمنییەکانەوە دەستگیرکراوە". 

تا ئێستا زانیاریی تەواو لەسەر گیراوی چالاکوان و خوێندکارانی خۆپێشاندەر لەبەردەستدا نییە و هێزە ئەمنییەکانیش هیچ لێدوانێکیان لەو بارەیەوە بڵاونەکردۆتەوە.