بەڕێوبەری گشتی تەندروستی گەرمیان رایدەگەیەنێت، بەهۆی خەرج نەكردنی چەكی بانك بۆیان، خەریكە خزمەتگوزارییە تەندروستییەكان بە تەواوەتی رادەگیرێت.
د. سیروان محەمەد، بەڕێوبەری گشتی تەندروستی گەرمیان لە كۆنگرەیەكی رۆژنامەوانیدا رایگەیاند، بە بڕی ١ ملیار و ٨٥٨ ملیۆن و ٧٤هەزار و ٩٠٠ دینار، چەكی خەرج نەكراویان هەیە كە لە بواری دەرمان و پێداویستی پزیشكی و تاقیگەیی و كرێی كۆمپانیاكان و سوتەمەنی و خەرجی رۆژانە و هی دیكەن.
ناوبراو ئاماژەی بەوەشكرد "بەم هۆیەوە بەشێك لە خزمەتگوزارییەكان پەكیان كەوتوە و چیتر ناتوانین بەردەوامیان پێ بدەین، بەشێكی تریشیان ئەگەر دۆخەكە بەم شێوەیە بەردەوام بێت ئەوانیش دەوەستن و رادەگیرێن".
د.سیروان دەڵێت "لە رووی دابینكردنی گوژمەی دارایی "تخصیصات المالیە" كێشەمان نیە و هەموو رێكارە فەرمیەكان لەلایەن وەزارەتەكانی تەندروستی و دارایی و ئەنجومەنی وەزیرانەوە بەڕێكراون، بەڵام كێشەكە لە نەبوونی نەختینەیە لە بانك كە هەر جارێك دەچین بۆ خەرجكردنی چەكی شایستە داراییەكان پارەی پێویست لە بانكدا بەردەست نییە".