بافڵ تاڵەبانی، سەرۆكی یەكێتی نیشتمانی كوردستان رایدەگەیەنێت، لەگەڵ دواخستنی هەڵبژاردن نین، بەڵام پێویستە یاسای هەڵبژاردن هەموار بكرێتەوە و تۆماری دەنگدەرانیش پاكبكرێتەوە.
بافڵ تاڵەبانی، سەرۆكی یەكێتی نیشتمانی كوردستان لە بەغدا لەگەڵ ئەلینا رۆمانۆسكی، باڵیۆزی ئەمریكا لە عێراق كۆبووەوە و دۆخی سیاسی و ئابووری عێراق گفتوگۆی لەبارەوە كرا و جەخت لە چارەسەركردنی كێشەكانی نێوان هەولێر و بەغدا كرایەوە.
وەك لە راگەیەنراوی نووسینگەی سەرۆكی یەكێتی هاتووە، بافڵ تاڵەبانی ئاماژەی بە هەنگاوەكانی حیزبەكەی كرد بۆ كۆتاییهێنان بە ناكۆكییەكانی نێوان هەولێر و بەغدا، دەستپێكی قۆناخێكی نوێی سیاسی و، رایگەیاند: "خەڵكەكەمان قوربانیی سەرەكی ناكۆكییەكانن و پێویستە بەزووترین كات كۆتایی بەو دۆخە نەخوازراوە بهێنرێت. دەبێت رێككەوتنێكی یەكجارەكی بكرێت و چارەسەرێكی بنچینەیی بۆ كێشەكان بكرێت، بۆ ئەمەش دەبێت دەستوور خاڵی یەكلاكەرەوە بێت".
لەبارەی دۆخی هەرێمی كوردستانیش، روونیكردەوە "ئامانجی ئێمە دەستەبەركردنی ژیانێكی ئارام و سەقامگیرە بۆ خەڵكەكەمان، هەموو هەوڵێكیش لەو پێناوەدا دەدەین و ژیانی خەڵك لە سەرووی هەموو شتێكەوەیە، پێویستە یاسای هەڵبژاردن هەموار بكرێتەوە و تۆماری دەنگدەرانیش پاكبكرێتەوە".