لە ماوەی هەفتەیەکدا لە سلێمانی 21 تۆمەتباری دزی دەستگیرکراون، پێنج لەوانەش ئافرەتن.

راگەیاندنی پۆلیسی سلێمانی بڵاویکردەوە، لەلایەن مەفرەزەكانیانەوە لەماوەی هەفتەی رابردوودا توانراوە 21 تۆمەتباری دزی بە ماددەكانی (443)،(444) و (446) لە یاسایی سزادانی عێراقی دەستگیربکرێن.

پۆلیسی سلێمانی دەڵێت، تۆمەتبارەکان دانیان بە تاوانەكەیاندا ناوە، پێنج لە تۆمەتبارەكانیش ئافرەتن.

لەو 21 کەسە سێ تۆمەتباریان ئافرەتن و بەهۆی دزی ماڵان و ساڵۆنەوە دەستگیر كراون. "هەروەها حەوت تۆمەتباری دیکە دەستگیركراون بەهۆی دزی ماڵانەوە كە دووانیان ژنن و قەرەچن".

پۆلیسی سلێمانی ئاماژەی بەوەشکردووە، سێ تۆمەتباری دزی مۆبایل دەستگیرکراون و حەوت تۆمەتباری دیکەش بەهۆی دزی جۆراو جۆرەوە دەستگیركراون.

پۆلیس دەڵێت، یەکێک لەو کەسانەی دەستیرکراوە تۆمەتبارە بە "فێڵكردن و وەرگرتنی زەكات و سەرفیترە".