راستە مێژووی كورد پڕیەتی لە جاشایەتی وخۆفرۆشی، بەڵام ئەو جاشایەتی وخۆفرۆشیە هەرگیز خەڵكی دڵسۆزی كوردستان نەیكردووە، ئەو كەسانە كردوویانە، كە دەسەڵاتدار بووینە ولەپێناو مانەوە وخۆشگوزەرانی خۆیان هەموو وڵاتیان تەسلیمی داگیر كەران كردووە، ئەوان بووینە گەنجی كوردی دڵسۆزیان ناچار كردووە، كە پەنا بۆ هەموو شتێك بەرێت، تەنیا بۆئەوەی لەدەستی ئەوان رزگاریان بێت، زۆربەی ئەوانەی وەك جاش دەناسرێن ورۆژێك لەرۆژان راوی پێشمەرگەیان دەكرد، گەنجی دڵسۆز و وڵاتپارێز بووینە و لەڕقی ئەوانە چەكی جاشایەتیان هەڵگرتووە، هەر بۆیە دوای راپەڕین ئاشت بوونەوە و ویەكتریان لەهەمێز كردەوە! لەمەودوا دەبێت مێژوونووسانی كورد مێژووی كورد وسەركردە جاش وخۆفرۆشەكان لەیەكتر جیابكەنەوە وبەجیا لەسەری بنووسن، لەبەرئەوەی سیخوڕ ونیشتمان فرۆشەكان وڵاتیان نیە، ئەوان بەشێك نین لەمێژووی ئەو نەتەوەیە، هەركاتێك ئەوانە لەمێژووی نەتەوەكەمان تووڕهەڵدران، بەشێكی زۆری كێشەكانی كورد چارەسەر دەبێت!

خەڵكی دڵسۆزی كوردستان لەوەتەی هەیە قوربانی دەدات وسەركردە بەناو سەركردەكانی دەیفرۆشن ودەیخەنە دەستی دوژمنەكانی، ئەگەر وانەبێت بۆچی تا ئێستا سەركردەیەكی باشوور، نەخۆی نەكەسێكی نزیكی نەكوژراوە ونە لەگوڵ كاڵتری پێگوتراوە! بۆچی قاسم لۆ، شەرەفكەندی، تیرۆكران، بۆچی وڵاتە داگیركەرەكانی كوردستان و هەموو دنیا بەدوای ئۆجەلانەوە بوو، تاوەك لەكونجی زیندانیان ئاخنی، ئەی بۆچی پێشوازی لەبەناو سەركردەكانی باشوور دەكرێت، بۆچی ئەوان تا تەمەنی …. دەژین وتەنانەت لەناو كونە شاخەكانیشدا، لەكاتیكدا پێشمەرگەكان بە سكێك تێر ودەیان سك برسی دەژیان، ئەوان ژیانێكی شاهانەیان دەبردە سەر!

كام سەركردەی باشوور هەبووە، نەك خۆی بەڵكو كەسێكی نزیكیشی لەشەڕێكی رووبەڕووبوونەوەی دوژمندا گیانی بەخت كردبێت؟ بۆچی هەزاران خانەوادەی كورد لەباشوور وێران بوو، منداڵی هەژاری كورد لەشارەكان، لەچیاكان، لەگوند وپێدەشتەكاندا، بەناوی كوردایەتیەوە راوەدوونران وتیرۆر كران، كەچی ماڵی سەركردەكان تادێت بەرزتر وئاوەدانتر دەبیتەوە! ئەوە چی دەگەیەنێت فڕۆكەكانی توركیا، تۆپەكانی ئێران، وڵاتەكەت بۆردومان دەكەن ونەك مرۆڤەكان بەڵكو دارەكانیشت دەبڕنەوە دەیسوتێنن، تۆش بەرگریان لێبكەیت، پێشوازیان بكەیت ودەست لەناو دەست بەروویان پێبكەنی! دەمەوێت بنووسم ئای ئەمە چ شەرمەزاریەكە، چ ریسواییەكە، بەڵام نەشەرمەزاری ونەریسوایی ئەو دۆخە پێناسە ناكات، بۆیە دەبێت لەبری ئەو وشانە بەدوای وشەی تردا بگەڕێین، شەرمەزاری بۆ رەفتاری كەسانێك شیاو نیە، كە هەموو تەمەنیان بۆ فرۆشتن وبێبەهاكردنی گەل و وڵاتەكەیان تەرخانكردووە!.