بەشی یەكەم
وا بڕیارە لە كۆتایی ئەم مانگە حزبی شیوعی كوردستان كۆنگرەی حەوتەمینی خۆی ببەستێت، نێوانی كۆنگرەی شەش و حەوت لە كۆتایی ئەم مانگە دەبێت بە پێنج ساڵ. هەرچەندە بە پێی پەیرەوی ناوەخۆ دەبوو لە ماوەی چوارساڵ ببەسترێت، بەڵام بەهۆی پەتای كرۆناوە ساَلێك بە بریاری كۆمیتەی ناوەندی دواخرا.
حزبی شیوعی كوردستان لە كاتێكا كۆنگرەی دەبەستێت وەزعی ناوەخۆی كوردستان و ناوچەكە و جیهان بە دۆخێكی ناجێگرو گۆڕاو تێدەپەرێت، بێگومان حزبیش وەك كیانێكی زیندووی كۆمەڵایەتی سیاسی لەناو هاوكێشەی كارلێكراو كارلێكەری تابلۆكەدایە بە رێژەی جیاواز .
لە ئاستی جیهانی و ناوەخۆدا لیبڕاڵیەتی نوێی سەرمایەداری تادێت زیاتر ناوەندی پەراوێزخراوان فراوان دەكات، ئەوەی دوێنی و پێرێ بەدەست هاتبوو لە مافە ئابوری و كۆمەڵایەتی و سیاسیەكان لە ئەنجامی و تێكۆشان وكاری بەیەكەوەیی بزوتنەوە كرێكاریی و پارتە چەپ و ئازادیخوازەكان،ئەمرۆ لە بەردەم هەرەشەی جدی دایە .
ئەم فۆرمە لە سەرمایەداری ناوەندی پەراوێزخراوانی لە ئاستی چین و توێژە كۆمەڵایەتیەكان زیاتركردووە وەك ئەنجامی چركردنەوەی زیاتری سامان و هێز لە چەنگی كەمینەیەك كە لە لایەك لە بازار و لە لاكەی تر لەحكوم و دەسەڵاتیشدان .
پیس بوونی ژینگە و گەرمبوونی گۆی زەوی و بەبیابان بوون و سەرهەڵدانی پەتای كرۆنا و هەڵكشانی جەنگ و بودجەی شەر و ناسنامەی لۆكاڵی و پێگەی راسیزم و هتد ... هەموو ئەمانە لە دەرەوەی قەیرانەكانی سیستەمی سەرمایەداریدا نین.
لە بەرامبەر ئەوەدا تێكۆشانی مرۆڤایەتی بۆ (بەدیهێنانی جیهانێكی تر،جیهانێك لەسەر بنەمای یەكسانی و دادپەروەری كۆمەڵایەتی)، نەوەستاوە.
ئەم تێكۆشانە نێونەتەوەییە سەرەڕای جیاوازی تەكتیكی سیاسی و جەماوەری و فۆرمەكانی تێكۆشان بە پێی جیاوازی واقیع لە ئاستی كاری پەرلەمانیەوە بۆ كاری سەندیكایی و فۆرمەكانی تێكۆشانی جەماوەری لەسەر بنەمای و ناوچە و گەرەك و شوێنەكانی كار و بزووتنەوە كۆمەڵایەتییەكان و كۆربەندە جیهانییەكان و تا دەگاتە خۆپیشاندان و راپەرینە خۆِرسك و نا رێكخراوەكانی ئەم دواییانە لەسەر ئاستی ناوەخۆ و جیهانیش، رۆژانەیە و بەردەوامە .
ئەگەر ئەوە وێنە گەورەكەی سیستەمی سەرمایەداری بێت لە ئاستە جیهانییەكەی، ئەوە لە ئاستی ناوەخۆی كوردستان و عێراق سەرەڕای ئەو كێشە و قەیرانانە رووبەڕووی چەندین قەیرانی تر دەبینەوە بە تایبەتمەندی ناوچەكەو شوناسی هێزە دەسەڵاتدارەكان و باری بابەتی و خودی .
هەرێمی كوردستان بە بارودۆخێكی زۆر خراپ گوزەر دەكات، دۆخەكە لە قەیران زیاتر و واوەتر رۆیشتووە. ئەم بارودۆخە جیاناكرێتەوە لەو قەیرانانەی كە سیستەمی سەرمایەداری لە ئاستی جیهان دروستیكردووە، هاوكات دابڕاویش نییە لە ئیشكالیەتی سیستەم و تایبەتمەندی قەیرانەكانی خۆرهەڵات و وڵاتانی دەوروبەر و جیهانی سێیەم .
تایبەتمەندی و سروشتی ئابووری بەرخۆری و چالاكی ئابووری و كەڵەكەكردن و چڕبونەوەی سامان و هێز لە دەستی كەمینەیەك، بنەمای قەیرانی سیستەمی سەرمایەداری هەرێمی كوردستان پێكدەهێنێت، وەك بەرهەمی دەسەڵاتێكی سەرمایەداری ئۆلیگاریشی تاڵانكەر .
لەم ژینگە جیهانی و ناوەخۆییەدا ئێمە لەسەرو بەندی بەستنی كۆنگرەی حەوتەمداین. دەبێت چی بكەین و چی بگۆرین و چاكسازی لە چ ئاستێكدا بكەین بۆ ئەوەی بتوانین لە ئاستی رۆڵ و بەر پرسیارەتی ئەم قۆناغەی ئەمرۆ و سبەی و پرسیارە گەورەكانی ژیانی تازە دابین وەك هێزێكی چەپی ماركسی؟ . ئەمانە و چەندین لایەنی تری ئیشكالیەتی ژیانی حزبی و فكری و سیاسی و تەكتیكی، بەشەكانی داهاتووی ئەم زنجیرە وتارە پێك دەهێنێت كە جۆرێك دەبێت لە خوێندنەوەیەكی رەخنەگرانە بە ئامانجی بەهێزكردنی پێگەی چەپ و ماركسییەكان لە پێناو داكۆكیكردن و بەدەستهێنانی مافەكانی كرێكاران و پەراوێزخراوەكان و ژنان و خەڵكی زەحمەتكێشی كوردستان. هەوڵێكیشە بە ئاراستەی دروستكردنی گفتوگۆیەكی فكری و سیاسی لە نێوان هاورێیان بۆ دووركەوتنەوە لە دیاردەكانی (شكاندنی كاراكتەر) لە بڕی پەنابردنە بەر (رەخنەكردن و گفتوگۆكردنی فكر و هەڵوێستی كاراكتەر)، ئەمەش دواجار دەبێتە هۆكاری باس نەكردن و پەرەدەپۆشكردنی جەوهەری كێشەكان و بە كەسایەتی كردن و زیاتركردنی مەیلی تەكەتول لەسەر بنەمای وەلائی كەسی و بنەماڵەیی و ناوچەگەرێتی و ناسنامەی لۆكاڵی، كە ئەمرۆ بەشێكی زۆری جەستەی تەواوی هێزە سیاسیەكانی كوردستانی داگیركردووە و یەكێكە لە هۆكارەكانی ئیشكالیەتی ژیانی حزبی و دواجار كەسە لاوازەكانی ناو حزبەكان بەهێز و سەر دەخات لە پێناو ئامانج و دەستكەوتی كەسی هتد ... .