"زۆرجار هەواڵی میدیاكان بووەتە سەرچاوەی زانیاریی تیرۆریستان"
ئەمینداری وەزارەتی پێشمەرگەی حكومەتی هەرێمی كوردستان رایدەگەیەنێت، پێویستە دەزگاكانی راگەیاندن لەكاتی رووماڵكردنی رووداوەكان و پرسیاركردن لەبەرپرسانی پێشمەرگە دووربكەنەوە لە پرسیاری تایبەت بە نهێنیەكانی سەربازی ، چونكە كاریگەری لەسەر بارودۆخە هەیە .
لە میانەی بەرێوەچوونی كۆنگرەیەكی رۆژنامەنوسی لەشاری هەولێر لەبارەی چۆنیەتی مامەڵەی راگەیاندن لەبارەی رەوشی ئەمنی هێزەكانی پێشمەرگە جەبار یاوەر رایگەیاند: بە درێژایی سنوری ناوچە كوردستانیەكانی دەرەوەی ئیدارەی هەرێم پێشمەرگە لە ئامادەباشیدان بۆ بەرگری لەخاكی كوردستان و هیچ جیاوازیەك لەنێوان ئەو ناوچانە نەكراو، بەڵكو شەڕ و قوربانیدان لەهەموو ئەو ناوچانە هەبووە .
ئەمیندار و وتەبێژی وەزارەتی پێشمەرگە لەكونگرە رۆژنامەنوسیەدا كە وەزیری رۆشنبیری و نوێنەری وەزارەتی ناوخۆ و ئەوقاف ئامادەی بوون راشیگەیاند: پێشمەرگە لە نێوان پێش 10/6 و دوای ئەو بەروارە هیچ پێشڕەویەكی نەكردووە ، بەڵكو ئێستاش لەهەمان ئەو شوێنانەن كە پێشتر بە رێكەوتن لەگەڵ حكومەتی فیدراڵ لەوناوچەنان جێگیر كراون، بەڵام ئێستا ئەو بۆشاییانەشیان پركردۆتووە كە سوپای عیراقی لێبوو .
لەبارەی كۆكردنەوەی كۆمەك بۆ پێشمەرگە جەبار یاوەر وتی: كۆكردنەوەی كۆمەك بۆ پێشمەرگە مانای ئەوە نییە پێشمەرگە كەموكوڕی هەیە و پێویستی بە هاوكاریە ، بەڵكو ئەوە تەنها دروستكردنی هەستی نیشتیمانی و نەتەوایەتیە لەلای هاوڵاتی كاتێك كۆمەك دەبەخشێت مانای ئەوە بە بەشدارە لە پاراستنی خاكی كوردستان .
هاوكات جەبار یاوەر ئەوەشی خستەروو: پێویستە دەزگاكانی راگەیاندن لەكاتی رووماڵكردنی رووداوەكان و پرسیاركردن لەبەرپرسانی پێشمەرگە دووربكەنەوە لە پرسیاری تایبەت بە نهێنیەكانی سەربازی ، چونكە كاریگەری لەسەر بارودۆخە هەیە .
وتیشی: زۆرجار بە هۆی ئەو هەواڵانەی لە هەندێك دەزگای راگەیاندن بڵاودەكرێتەوە پێشمەرگە شەهید بووە و ئەو هەواڵە بۆتە سەرچاوەی زانیاری تیرۆرستان تاكو ئەوناوچانە بكەنە ئامانج.
PM:02:44:27/06/2014