پەرلەمانی كوردستان نووسینگەی خۆی لە شاری كەركوك دەكاتەوەو پەرلەمانتارێكیش پێیوایە، كردنەوەی نووسینگە لەو شارە، هەنگاوی یەكەمە بۆ سەربەخۆیی كوردستان.

بێستوون فایەق، پەرلەمانتاری كوردستان لەسەر فراكسیۆنی گۆڕان، بە خەندانی راگەیاند: "پەرلەمانی كوردستان، بە كردنەوەی نووسینگەیەك لە شاری كەركوك، ئەو شارە دەگەڕێنێتەوە سەر كوردستان".

ئاماژەی بەوەشدا، كە لە چەند رۆژی داهاتوودا، نوسینگەی پەرلەمانی كوردستان لە شاری كەركوك دەكرێتەوە و لە ئێستادا ئامادەكارییەكانی لە تەواوبووندایە.

بێستوون فایەق ئەوەشی خستەڕوو، كە بوونی نوسینگەی پەرلەمان لە شاری كەركوك ئاماژەیە بۆ بەڕەسمی گەڕانەوەی كەركوك بۆ سەر كوردستان.

ناوبراو وتیشی : "كردنەوەی نووسینگە، ئاماژەیە بۆ جیانەكردنەوەی كەركوك لە پارێزگاكانی تری هەرێم، چونكە پەرلەمانی كوردستان نووسینگەی لە پارێزگاكانی تری كوردستان هەیە و بوونی نووسینگەش واتا بونی پەرلەمان لەو شارە".

ئەو پەرلەمانتارە دەشڵێت : "بوونی دەزگایەكی گرنگی هەڵبژێردراوی خەڵك لە شاری كەركوك هەنگاوی یەكەمی دانەبڕینی خەڵك و خاكی كەركوكە لە كوردستان و هەنگاوی یەكەمی سەربەخۆیی كوردستانە بە كەركوكەوە".