ئەندامێکی پەرلەمانی کوردستان لەسەر پشکی گۆڕان دەڵێت، "گۆڕان ئێستا لە قۆناخی بنیاتنانەوەیە لە هەموو ئاستەکانی سیاسی رێکخراوی ،هاوپەیمانی، حکومی، چاوخشاندنەوە بەهەموو هەڵوێستەکان و راستکردنەوەی هەڵەکان".

لە نوسینێکدا، یاسین خزر، پەرلەمانتاری کورد لە پشکی فراکسیۆنی بزوتنەوەی گۆڕان لە پەڕەی فەرمی خۆی دەڵێت" هەندێک بەناو نوێنەر و لادەر لەو پەیمانە ئەخلاقی و یاسایی و سیاسییەی بە خەڵکی کوردستان و گۆڕانیان دابوو بەرگەی بەخۆداچونەوە ناگرن و بە پاساوی پەرۆشی درۆزنانە و نمایشکارانە خۆیان لە بەرپرسیارێتی دەکێشننەوە و بە دوای بەرژەوەندییە کەسیەکانی خۆیان وێڵ دەبن".

دەشڵێت" رۆژێک راستیەکانیان بۆ خەڵک دەردەکەوێت و دەکەونە بەر نەفرەتی مێژوو و خەڵکی کوردستان ،وەک بێ وەفاترین و خۆپەرسترین پیاوی بچوک دەناسرێن".

لە ١٠ی تشرینی یەکەمی ٢٠٢١دا هەڵبژاردنی ئەنجومەنی نوێنەرانی عێراق بەڕێوەچوو، بزوتنەوەی گۆڕان هیچ کورسییەکی بەدەست نەهێنا، ئەمەش بووە هۆی دەستلەکارکێشانەوەی رێکخەری گشتی بزوتنەوەکە و خانەی راپەڕاندن.