وتەبێژی بازاڕی دۆلارەکەی سلێمانی دەڵێت  "بەرز بوونەوە و دابەزینی نرخی دراو لە ڕۆژانی هەینی "ورد" نییە و سبەینێ شەممە نرخی تەواوەتی و جێگیری دۆلار بەرامبەر دینار دەزاندرێت".

ئەمڕۆ هەینی، ١٨ی شوبات، لە چەند میدیا و هەژمارێکی تۆڕە کۆمەڵایەتییەکان وابڵاوکرایەوە کە دوای تویتەکەی موقتەدا سەدر، ڕێبەری ڕەوتی سەدر لەبارەى نرخی دراو و دۆخی بازاڕ، نرخی دۆلار بەرامبەر دینار دابەزیوە، هەر لەو بارەیەوە جەبار گۆران، وتەبێژی بازاڕی دۆلارەکەی  سلێمانی باسی لەوەکرد،  ئەمڕۆ هەندێک گۆڕانکاری لە نرخی دۆلار بەرامبەر دینار ڕوویداوە و نرخی ١٠٠ دۆلار دابەزیوە بۆ ١٤٧ هەزار و ٥٠٠دینار، بەڵام ئەمە نرخێکی ورد و تەواو نییە چونکە بانک و بازاڕەکانی دراو لە ڕۆژانی هەینیدا داخراوە و نرخەکان فەرمی نین.

 باسی لەوەشکرد، هۆکاری ناجێگیری نرخەکە ئەو چەند پێشنیازەی سەدر و بانگهێشتکردنی وەزیری دارایی و پارێزگاری بانکی ناوەندی بوو کە دوێنێ خستییەڕوو.

ئەمەش لە کاتێکدایە، دوێنێ پێنجشەممە، ١٧ی شوبات، موقتەدا سەدر، ڕێبەری ڕەوتی سەدر چەند پێشنیازێک لەبارەی نرخی دۆلار بەرامبەر بە دینار دەخاتەڕوو و داوای بەپەلە بانگهێشتکردنی وەزیری دارایی و پارێزگاری بانکی ناوەندی بۆ پەرلەمان دەکات.

1- به‌توندی رێگری بكرێت له‌ دراوی ساخته‌ و بەهەدەردانی دراوەکان رابگیرێ. 

2- چاوخشاندنەوە بە کاری هه‌ندێك لە بانکەکان كه‌ كۆنتڕۆڵی به‌های دراوه‌كان ده‌كه‌ن.

3- ده‌ستبه‌جێ پارێزگاری بانكی ناوه‌ندی بۆ په‌رله‌مان بانگهێشت بكرێت. 
 

4- ده‌ستبه‌جێ وه‌زیری دارایی بانگهێشتی به‌رده‌م په‌رله‌مان بكرێت .

5- ڕێكخستنی بازاڕی دراوی عێراقی به‌ شێوه‌یه‌كی ناوه‌ندی و ڕێكوپێك و به‌پێی چەند یاسایەک كه‌ به‌های دیناری عێراقی زیاد بكات.

6- مامه‌ڵه‌كردنی توند له‌گه‌ڵ چه‌ند بانكێكی سه‌ر به‌ هه‌ندێك له‌و حزبانه‌ی كه‌ كۆنتڕۆڵی وڵات و خه‌ڵكیان كردووه‌.