تا ئێستا بە تەواوی یەکلایی نەبۆتەوە کە حکومەتی عێراق بڕیاری ناردنی ٤٠٠ ملیار دینارەکە بۆ پاڵپشتی دابەشکردنی مووچەی مووچەخۆرانی هەرێم لەم هەفتەیەدا دەخاتە سەر هەژماری بانکی هەرێم.

سبەی، یەک شەممە ١٨ ی کانوونی یەکەم وەک چەند بەرپرسێکی کورد لە بەغدا رایانگەیاندبوو کە یەک شەممە وەزارەتی دارایی عێراق بڕی ٤٠٠ ملیار دینارەکە دەنێرێتە سەر هەژماری بانکی هەرێم لە هەولێر، بەپێی زانیاریەکانی " سپی " گەر سبەی بەغدا ئەم کارە ئەنجام بدات، ئەوا حکومەتی هەرێم لەو ماوەیەدا کە ماوە بۆ کۆتایی ئەم مانگە مووچەی سەرجەم وەزارەتەکان دابەشدەکات.

بەپێی زانیارییەکانی ماڵپەڕی " سپی " گەر لە سەرەتای ئەم هەفتەیەدا ئەو پارەیە لەلایەن حکومەتی بەغداوە رەوانەی هەولێر نەکات، ئەو دەمە دابەشبوونی مووچەی مانگی ١٢ دابەشناکرێت و دەگوازرێتەوە بۆ سەرەتای مانگی داهاتووی ساڵی ئایندە ٢٠٢٣.

لە کاتێکدا ئاماژە بۆ دابەشکردنی مووچەی مانگی ١٢ دەکرێت، بەلآم تا ئێستا بەتەواوی مووچەی مانگی ١١ ی سەرجەم وەزارەت و دەزگاکانی هەرێم دابەشنەکراون و، بەپێی خشتە مووچەی راگەیەندراو کۆتایی ئەم هەفتەیە دابەشدەکرێت.